+22 °С
Ямғыр
Яңылыҡтар таҫмаһы
31 Июль 2024, 11:30
Аҡсаны кире ҡайтара аламмы?
Интернет селтәрендә инглиз телен өйрәнеү буйынса дүрт айлыҡ түләүһеҙ курстар тураһында иғлан күреп ҡалдым да, теләк белдереп, телефон номерымды ҡалдырҙым. Бер аҙҙан шылтыратып, уҡыу курсының бер йыллыҡ булыуы, һигеҙ айына тулайым түләгән осраҡта ғына ҡалған айҙар бушлай булыуын әйттеләр. Өгөтләүҙәренә бирелеп, курстар өсөн аҡса күсерҙем. Тик уҡыуҙар башланғас ҡына барыһы ла алдаҡ булыуын аңланым: уҡытыусылар йыш алмашына, уҡырға теләүселәр күп, класс бүлмәһе бәләкәй генә, программа системаға һалынмаған һәм башҡалар. Ҡыҫҡаһы, уҡыуҙың файҙаһы юҡ. Мин һәм тағы ла бер нисә кеше ике аҙнанан һуң ризаһыҙлыҡ белдереп ғариза яҙҙыҡ, әммә беҙгә аҡсаларҙы кире ҡайтарыуҙан баш тарттылар. Был осраҡта беҙ нимәлер эшләй алабыҙмы?
Аҡсаны кире ҡайтара аламмы?
– Аҡсаны кире ҡайтарыу осраҡтары тураһындағы мәғлүмәттәр һеҙ белем биреү ойошмаһы менән төҙөгән килешеүҙә яҙылған булырға тейеш. Тәү сиратта, документты ентекле ҡарап сығығыҙ. Һәр хәлдә, түләүле белем биреү хеҙмәтенең кәмселектәре асыҡланған осраҡта, шулай уҡ белем биреү уҡыу-уҡытыу тәртибендә ҡаралған кимәлдә алып барылмаһа, һеҙ был хеҙмәтте түләүһеҙ күрһәтеүҙе, уҡыу хаҡын кәметеүҙе, йә иһә уҡыу өсөн тотонолған сығымдарҙы ҡаплауҙы талап итә алаһығыҙ. Мөрәжәғәт иткәндән һуң, билдәле бер ваҡытта етешһеҙлектәр бөтөрөлмәһә, һеҙҙең килешеүҙән баш тартырға һәм түләгән аҡсаны талап итергә хаҡығыҙ бар. Шулай уҡ килешеүҙә ҡаралған шарттар үтәлмәгән осраҡта килешеүҙән баш тарта алаһығыҙ (Рәсәй Хөкүмәтенең 2020 йылдың 15 сентябрендәге 1441-се “Түләүле белем биреү хеҙмәттәре күрһәтеү тураһындағы” ҡарары).
Килешеүҙе өҙөргә һәм аҡсаны ҡайтарып алырға теләһәгеҙ, күрһәтелгән хеҙмәттең сифатһыҙ булыуын судта дәлилләргә тура киләсәк. Юғиһә, хеҙмәт күрһәтеүселәр һеҙҙең тейешле белем ала алмауығыҙҙы сифатһыҙ хеҙмәттән түгел, ә үҙ ғәйебегеҙҙән (аң кимәле түбән, уҡыуға илке-һалҡы ҡараш һәм башҡалар) булыуын күрһәтер. Шуға күрә быға алдан әҙерләнегеҙ. Әле уҡыуығыҙҙы ташламаған булһағыҙ, хоҡуҡтарҙы боҙоу, уҡытыу тәртибен тотмау осраҡтарын рәсмиләштерергә тырышығыҙ. Шаһиттар ҡул ҡуйған дәғүәләр яҙығыҙ. Ризаһыҙлыҡ белдергән башҡа уҡыусылар менән берләшеп эш итһәгеҙ, аҡсағыҙҙы кире ҡайтарып алыу мөмкинлектәре артасаҡ.
Һорауҙарға 1-се категориялы адвокат Артур БӘДӘМШИН яуап бирҙе.
