Диабеттан ниндәй дарыу үләндәренең файҙаһы бар?

  Шәкәр кимәлен кәметеү өсөн аҙыҡ-түлектән  арбузды,  кәбеҫтәне, сөгөлдөрҙө,  кишерҙе, һарымһаҡты, һуғанды, укропты, әсе алманы, зәйтүн майын, диңгеҙ кәбеҫтәһен ҡулланырға мөмкин.

Ә үлән төнәтмәләренә килгәндә, түбәндәгеләрҙе  әҙерләп эсергә була.

1. Ҡыҙыл көртмәле япрағы, ҡайын еләгенең  бөтә өлөшөн, бәпембә тамыры,  гөлйемеш емеше,  етен орлоғо, һоло һаламы, мелисса үләнен  бер үк күләмдә алып,  ваҡларға. 8 г ошо үләндәрҙең онтағына 300 мл  ҡайнар һыу ҡойоп, пар өҫтөндә  15 минут парҙа тоторға һәм бер сәғәт йылы урында төнәтергә. Көнөнә  дүрт тапҡыр ашарҙан 15 алда  1/3 стакан эсергә.
2. Бер үк күләмдә юшан үләне (вероника), ҡайын япрағы, кесерткән үләне, дегәнәк тамыры, ҡарар ҡарағат япрағы, алма ҡабығы, етен орлоғо алына. 8 г ошо үләндәр тупланмаһына  300 мл ҡайнар һыу ҡойоп, пар өҫтөндә 15 минут тоторға һәм термоста  2 сәғәт төнәтергә.  Көнөнә өс-дүрт тапҡыр 1/3 –  1/2 стакан эсергә.
3. Кесерткән үләне, бәпембә тамыры, миләш  емеше, ҡара көртмәле үҫентеһе, гөлйемеш емеше, бөтнөк үләне шулай уҡ бер үк күләмдә алына. 6 г ошо үләндәрҙең онтағына 350 мл ҡайнар һыу ҡойоп, парҙа 10 минут йылытырға, һуңынан йылы урында 3 сәғәт төнәтергә.  Бөтә төнәтмә  ашар алдынан өс-дүрт тапҡыр  эсеүҙә бөтөргә тейеш.
4. Ҡыҙыл көртмәле япрағы, ҡайын еләге япрағы, дегәнәк тамыры, ҡомалаҡ, ҡара көртмәле шытымы, бөтнөк үләне шулай уҡ һәр береһе бер үк күләмдә алына.  8 г  ошо үләндәрҙең онтағына 300 мл ҡайнар һыу ҡойоп, 2 минут ҡайнатырға  һәм 2 сәғәт термоста төнәтергә.  Ашарҙан  10 минут алда 1/3 – ¼ стакан эсергә.
5. Ҡыҙыл көртмәле япрағы, һары мәтрүшкә, әстерхан сәтләүеге япрағы, сирень бөрөһө, андыҙ тамыры, фасоль ҡабығына (8 г)  400 мл ҡайнар һыу ҡойоп, 15 минут парҙа тоторға һәм  2 сәғәт йылыла  төнәтергә. Әҙер булғас, көнөнә өс тапҡыр ашарҙан 10 минут алда яртышар стакан эсергә.

Ошо төнәтмәләрҙе  ай ярым – ике ай эскәндән һуң   күп ауырыуҙың  углеводтар һәм май алмашыныуы нормаға килә. Әммә фитотерапияны курслап үтергә кәрәк, йәғни  ике – өс ай эскәндән һуң  ике – өс аҙна ял итеп алырға кәрәк.

Фото:асыҡ сығанаҡтарҙан.