"Предприятие хеҙмәткәрҙәре барыһы ла ойошҡан рәүештә эшләй"

Кисә Бөйөк Еңеү көнөндә, төшкө сәғәт 1-ҙәрҙә дошмандың пилотһыҙ осоу аппараты Салауат сәнәғәт зонаһына һөжүм итте. Һөҙөмтәлә “Газпром нефтехим Салауат” предприятиеһы объекттарының береһендә төтөн таралған. Зыян күреүселәр юҡ, заводта технологик процесс боҙолмаған.

Башҡортостан Башлығы һөжүм урынын ҡараны, уның эҙемтәләрен бөтөрөүгә күпме ваҡыт кәрәк буласағын асыҡланы. Оператив штаб ултырышында пилотһыҙ осоу аппараттарын ҡулланып хәүефте юҡҡа сығарыу буйынса күрелгән саралар, республиканың алдынғы сәнәғәт предприятиеларының дрондан һаҡланыуын көсәйтеү кәрәклеге тикшерелде.

– Кисәге хәл осраҡлылыҡ түгел, ә ысын террористик һөжүм булды. Предприятиеның штат режимында эшләүе мөһим. Ике-өс көн дауамында пилотһыҙ аппарат һөжүме һөҙөмтәһендә булған шартлау буйынса ҙур булмаған ремонт эштәре үткәреләсәк. Предприятие хеҙмәткәрҙәренең барыһы ла ойошҡан рәүештә эшләй. Етештереү күрһәткестәренә лә был бер нисек тә тәьҫир итмәйәсәк, – тине Радий Хәбиров ултырыш йомғаҡтары буйынса. – Бөгөн предприятиеларҙың оборона системаһының нисек эшләүен ҡараныҡ. Беҙ һаҡланыу системаларын көсәйтеү буйынса бер нисә өҫтәмә сараны тикшерҙек. Был “Газпром нефтехим Салауат” компанияһына ғына түгел, ә беҙҙәге бөтә ҙур нефть химияһы һәм нефть эшкәртеү комплексына ҡағыла.