Мәскәүҙә — Башҡортостандың сәләмәтлек аҙналығы

- Республикала һаулыҡ һаҡлауға ҙур иғтибар бирелә, тармаҡ даими үҫешә.  Федераль һәм төбәк программалары ярҙамында беҙ яңы үҙәктәр асабыҙ, поликлиникалар, фельдшер-акушер пункттары төҙөйбеҙ, медицина учреждениеларын заманса ҡорамалдар менән йыһазландырабыҙ. Медицинаны һәр кемгә яҡынайтыуға һәм сифатын күтәреүгә ҙур иғтибар бирелә.  Күргәҙмә-форумда республика ҡаҙаныштары интерактив форматта күрһәтеләсәк, ҡунаҡтар оҫталыҡ дәрестәрендә, викториналарҙа  ҡатнаша ала, – тип билдәләне Башҡортостандың һаулыҡ һаҡлау министры Айрат Рәхмәтуллин.   

Аҙналыҡтың беренсе көнөн сәләмәт йәшәү рәүешенә арнанылар.  Күргәҙмәлә ҡатнашыусылар стресс кимәлен тикшерҙе, йөрәк-ҡан тамырҙары ауырыуҙары хәүефен асыҡланы.   

Иртәгә Репродуктив сәләмәтлек көнө билдәһе аҫтында үтә.    Республика  перинаталь  үҙәге  белгестәре буласаҡ атайҙарға конкурстар ойоштора.  

15 февралдә Башҡорт дәүләт медицина университеты хеҙмәткәрҙәре һәм медик-ирекмәндәр беренсе ярҙам күрһәтеү буйынса мастер-кластар үткәрә.   Шулай уҡ күргәҙмәлә ҡатнашыусылар ваҡы лыса хирург ролен үтәп, ысын симуляторҙа лапороскопия ысулы менән операция үткәрә ала.   

16 февраль – кисектергеһеҙ ярҙам көнө.   Ғ. Ҡыуатов исемендәге республика клиник дауаханаһы  табиптары кешеләрҙе ҡбул итеп, консультация үткәрә, “Йоматау”  шифаханаһы вәкилдәре ҡымыҙ менән дауаланыуҙың  файҙалы үҙенсәлектәре тураһында һөйләйәсәк.   

Йәкшәмбе көнө аҙналыҡты Спорт медицинаһы көнө йомғаҡлай.   Доктор Регина сәләмәт туҡланыу тураһында  һөйләһә, ысын йыһангир автограф сессия уҙғара. 

Көн һайын  стендта республиканың «Ассы», «Красноусольск», «Яҡтыкүл», «Танып», «Йоматау», «Йәшел сауҡалыҡ», «Ҡарағай» һәм «Янғантау» кеүек иң шәп шифаханаларына турҙар уйнатыласаҡ.