Йәштәр майҙансығы

«Юлдаш» радиоһының йәш алып барыусылары, тауыш ре­жиссерҙары тәүге эфирҙарына һулыш өрөүселәр була. Һуң­ғараҡ радио студияһы студенттар өсөн практика урынына әйләнә. Йәш алып барыусылар уҡыуҙан буш ваҡыттарында бында үҙҙәрен журналист һәм алып барыусы булараҡ һынап ҡарай. Үҙҙәрен ошо өлкәлә тапҡандары, яҙмыштарын радио эше менән бәйләргә теләгән һәләтлеләре эшкә алына, тулы хеҙмәт юлына баҫа. Интернет-радио – профессиональ медиаиндустрияны әҙер­лек­ле кадрҙар менән байытыу­сы, тип тулы ышаныс менән әйтергә мөмкин. 
Әлегә машинала, йорттарҙа һәм эш урындарында радиоал­ғыстар аша ишетеп булмаһа ла, заманса, йәштәрсә йырҙары менән интернет киңлектәрен яулап алған «Юлдаш Плюс» интернет-радиоһын  Башҡортос­танда ғына түгел, Татарстан Республикаһында, Силәбе, Ырымбур, Свердловск өлкә­ләрендә, Мәскәү, Санкт-Петербург, сит илдәрҙә лә тыңлау­сылар күп. 
Йәштәр радиоһы тәүлек әйләнәһенә эшләй. Киске сәғәт 7-нән 9-ға тиклем тура эфирҙа йәш алып барыусылар башҡорт телендә ҡыҙыҡлы темаларға әңгәмә ҡора. Эстрада “йондоҙ­ҙары”, блогерҙар, әүҙем студенттар, йәмәғәт эшмәкәр­ҙәре, эшҡыуарҙар һәм башҡа өлкәлә эшләгән йәштәр менән һөй­ләшә, тыңлаусылар­ҙың һо­рау­ҙарына яуап бирә. Эфир­ҙан тыш интернет-радио хеҙмәт­кәрҙәре республика йәш­­тәре өсөн мәҙәни-күңел асыу сараларын үткәрә, ҡала һәм ра­йондарҙа Йәштәр көнө, асыҡ һауала концерт-дискотекалар, һырғалаҡта шыуыуҙар һәм башҡа күңелле осрашыуҙар ойоштора. Йыл һайын үткә­релгән “Юлдаш Плюс” милли йәш­тәр фестивале төрлө ай­ҙарҙағы хит-парад еңеүсе­ләрен бүләкләй, билдәле башҡарыу­сыларҙы, блогерҙар­ҙы, йәш композиторҙарҙы, бе­йеү­селәр­ҙе, шағирҙарҙы, йырҙарға кавер яҙыусыларҙы, тренд булдырыу­сыларҙы бер сәхнәлә йыйып, “иң-иң”дәрен асыҡлай. 
“Юлдаш Плюс” – әлеге көндә республикала ижад менән йәшәгән башҡорт йәштәрен ҙур кимәлдә туплаған берҙән-бер майҙан. Майҙан тынмаһын, гөрләп тор­һон өсөн уның турала хәстәрлек күреү зарур. Үҫеш юлындағы йәштәр бар матур башланғыс­тарын хуп­лауға өмөт итә.  Нисек кенә баналь яңғырамаһын: “Киләсәк бөгөн башлана!”