Туризм өлкәһендә 7 млрд һумлыҡ килешеүгә ҡул ҡуйылды

- Әбйәлил районының Яҡтыкүл буйында урынлашҡан «Ике тау» курортын төҙөүҙе иң ҙур проекттар иҫәбенә индерергә мөмкин. Инвестор проектҡа 5,5 миллиард һум һалырға ниәтләй. 500 самаһы яңы эш урыны булдырыу планлаштырыла, - тип белдерҙе БР эшҡыуарлыҡ һәм туризм министры Рөстәм Афзалов. Шулай уҡ Көйөргәҙе районында «Яҡут тоҙло сығанағы» шифаханаһын төҙөү буйынса проектты тормошҡа ашырыу буйынса «СТК» яуаплылығы сикләнгән йәмғиәтен ойоштороусы Рафаэль Байназаров менән инвестиция ниәттәре тураһында килешеү төҙөлдө. Шифахананы асыу 120 яңы эш урыны бирәсәк һәм эске туризмды үҫтереүҙә ыңғай роль уйнаясаҡ. Йәйге осорҙа 750 кешегә һәм ҡышҡы осорҙа 450 кешегә иҫәпләнгән номер фондын булдырыу планлаштырыла.

«Беренселәр йондоҙлоғо» яуаплылығы сикләнгән йәмғиәте директоры Альбина Ғизәтуллина менән Өфөлә йыл әйләнәһенә эшләгән 25 яңы эш урыны менән һауыҡтырыу үҙәге төҙөү буйынса хеҙмәттәшлек тураһында килешеү төҙөлгән. Башҡортостандың өҫтөнлөклө инвестиция проекттары иҫәбенә ингән проект буйынса инвестициялар күләме 110,5 миллион һум тәшкил итәсәк.