Март айына яңы фараз

Был юлы Рәсәйҙең Гидрометүҙәге лабораторияһы мөдире Людмила Паршина марттағы көндәрҙең нисегерәк буласағын күҙаллай.

Мәскәүҙә ҡыҙыҡ көн торошо фаразлана – төндә -5, көндөҙ +6 градус. Был уртасаһы. Мәҫәлән, һыуытҡанда төндә -15-кә төшөүе лә ихтимал, был ваҡытта көндөҙ +3 градустан да күтәрелмәйәсәк. Илдең баш ҡалаһында ғына түгел, күп төбәктә, айырыуса үҙәк Рәсәйҙә шундайыраҡ температура буласаҡ. Элегерәк Мәскәүҙәге көн торошо беҙгә ике-өс көндән килеп етә торғайны. Хәҙер был ҡағиҙә эшләүен эшләмәй, шулай ҙа кем белә?

Мартты иң ҡоро ай булыр, тип тә фаразлайҙар. Йәғни, яуым-төшөм көтөлмәй. Буранай үҙенең исемен аҡламаҫмы икән ни? Бәлки. Башҡортостанда был ай бигүк яҙҙы һиҙҙермәүе лә ихтимал. Хәйер, Рәсәйҙең көньяғында ла артыҡ йылы вәғәҙә ителмәй.

Иң һыуыҡ март Яҡутстанда (-45 градус) һәм Таймырҙа (-40 градус) буласаҡ.