Ҡуҙылар сәләмәт тормош яҡлы

Кисә Бөрө районының Ҡуҙы ауылында “Мин, һин, ул бергә – көслө ил” тип аталған ҙур сара -үтте.

Унда ҡатнашыусыларҙы Бөтә донъя башҡорттары ҡоролтайының Демография, һаулыҡ һаҡлау буйынса комиссияһы рәйесе, Башҡорт дәүләт медицина университеты профессоры, Башҡортостан Республикаһының атҡаҙанған фән эшмәкәре Марсель Тойғонов тәбрикләне.

– “Айыҡ ауыл” конкурсы айыҡ йәшәү рәүешен пропагандалауға, алкоголизмды булдырмау буйынса эштәр алып барылған ауыл-ҡасабаларҙы асыҡлауға һәм дәртләндереүгә йүнәлтелгән. Ысынлап та, айыҡ ауылдар илебеҙҙең именлеге һәм яҡты киләсәге өсөн нигеҙ булып тора. Бөрө районы Ҡуҙы ауылына республика этабында еңеү теләйем, — тине Марсель Тойғонов.

“Шуны билдәләп үтергә кәрәк: Ҡуҙы ауылы халҡы был конкурста ҡатнашыу өсөн бар көсөн, дәртен, ижади һәләттәрен һалып, сәләмәт көнәркәшлек рухында йәшәй", – тине Шишмә ауыл Советы ауыл биләмәһе хакимиәте башлығы Ирина Асмаева.

Ауыл халҡы һәм ҡунаҡтар бай байрам программаһында ҡатнашты. Бер юлы бер нисә интерактив платформа эшләне. "Берҙәм ғаилә" сайтында һәр кем Бөрө районында йәшәгән халыҡтарҙың мәҙәниәте, ғөрөф-ғәҙәте һәм йолалары менән таныша алды. Бөрө медицина-фармацевтика колледжы студенттары иһә байрамда ҡатнашыусыларға бушлай тикшереү үтергә тәҡдим итте: күҙҙәге ҡан баҫымын үлсәү, сатурацияны тикшереү һәм башҡалар. Шулай уҡ беренсе медицина ярҙамы күрһәтеү дәрестәре үтте, үлән сәйен тәмләп ҡарарға тәҡдим ителде.

Урындағы оҫталар барыһын да тал үреү буйынса оҫталыҡ дәрестәренә саҡырҙы, кәсепселәр йәрминкәһе ойошторолдо. Шулай уҡ  арҡан тартыу, гер күтәреү, тауҙан шыуыу һәм башҡа спорт уйындары һәм ярыштар үткәрелде. Саңғыла шыуырға яратыусылар 1000 метрлыҡ арауыҡҡа уҙышты.

Байрам бай йөкмәткеле концерт программаһы менән тамамланды: унда ҡуҙылар ғына түгел, ә райондың башҡа ауылдарынан да һәүәҫкәр артистар, ижади коллективтар ҡатнашты.