Рөстәм Нәбиев ауыр хәлдә

Омскиҙа казарма емерелеү ваҡытында аяҡтарын юғалтҡан Рөстәм Нәбиев сәләмәтлеге ҡаҡшауы арҡаһында яңы тауҙарға артылыуҙан ваҡытлыса баш тартырға ҡарар итте. Был хаҡта ул үҙенең социаль селтәрҙәге сәхифәһендә хәбәр итте.

Хәтерегеҙгә төшөрәбеҙ, яңыраҡ Нәбиев Көньяҡ Американың иң юғары нөктәһенә – Аконкагуа тауына күтәрелде. Блогер һүҙҙәренсә, сәфәр планға ярашлы тамамланған, әммә быға оҡшаш экстремаль шарттар уның һаулығын ҡаҡшатҡан.

• Тауҙарҙы яулауҙы бер аҙға туҡтатам. Был паузаның ни тиклем оҙаҡ дауам итерен белмәйем. Йыл. Икәү. Өсәү, – тип яҙҙы Рөстәм Нәбиев. – Быйыл беҙ Эверест тауына барырға тейеш инек. Әммә һаулығым насарайғандан-насарая барғанын тоям. Һәр үргә артылыу миңә оло ауырлыҡ менән бирелә.

Билдәле булыуынса, блогерҙың Манаслуға күтәрелгән мәлдә, 2021 йылдың октябрендә, яурынындағы кимерсәге өҙөлгән. Нәбиев 2023 йылды үҙенә, ғаиләһенә, үҫешенә һәм һаулығына бағышларға хәл иткән. Уға өс операция үткәрергә тура киләсәк: яурынына, шулай уҡ урология һәм оториноларингология өлкәһендә.

Рөстәм Нәбиев һүҙҙәренсә, киләсәктә ул сираттағы түбәләргә күтәреләсәк, ләкин бөгөн түгел.

Фото: Т. Аманов