Тағы бер бензовоз түңкәрелгән...

Ни булған бензовоздарға: кисә Өфө районында, Р-240 федераль юлында, бензовоз юлдан төшөп китһә, бөгөн иртән Краснокама районында, Дүртөйлө-Нефтекама юлында, тағы шундай уҡ хәл теркәлгән.

Был автомобиль дә дизель яғыулығын алып китеп барған булған. Яғыулыҡ әллә ни күп аҡмаған, тип белдерәләр. Зыян күреүселәр юҡ, шөкөр. Һәләкәт эҙемтәләрен бөтөрөү өсөн Ғәҙәттән тыш хәлдәр министрлығынан 30 кеше, 11 берәмек техника йәлеп ителгән.

Водителде тикшереү уның иҫерек булыуын күрһәткән. Авариянан һуң эстем, тип аҡлана ир. Ваҡиға урынында Дәүләт автоинспекцияһы хеҙмәткәрҙәре һәм башҡа ашығыс хеҙмәттәр эшләй. Хәлдең нисек булыуы асыҡлана.

Фото: БР ЮХХДИ.