Ике намыҫһыҙ тотолған

Бәләбәй районында йәшәгән 79 йәшлек әбейгә ялған "хоҡуҡ һаҡлау органдары хеҙмәткәре" шылтыратып, улының арҡаһында авария булғанын хәбәр иткән. Йәнәһе лә, балағыҙға ҡарата енәйәт эшен астырғығыҙ килмәһә, зыян күреүселәргә компенсация түләгеҙ. Пенсионер әбей, миндә ни бары 80 мең һум ғына аҡса бар шул, тип ыуаланған... Бер аҙҙан, аҡсаны курьерға биреп ебәргәс, улына шылтыратып, алданыуын белгән. Бәләбәй ҡалаһынан икенсе әбей бәләгә тарыған ейәнсәрен ҡотҡарыр өсөн аферистарға 290 мең һум тотторған.

Оператив-эҙләү саралары барышында мутлыҡта ғәйепләнеүселәр тотолған.

Алдан хөкөм ителгән 32 йәшлек ир Иглин районынан, ә 17 йәшлек егет - Өфөнән.

Иргә "еңел эште" социаль платформаларҙың береһендә тәҡдим иткәндәр. Өҫтәмә аҡса сығанағы табылыуына ҡыуанып, ул эшкә тотонған - курьер вакансияһына кешеләр эҙләп табыу менән шөғөлләнгән. 17 йәшлек егетте лә ул тапҡан. Ололарҙан алған аҡсаның күпмелер процентын үҙҙәрендә ҡалдырып, ҡалғанын "эш биреүсегә" ебәргәндәр.

Был ике намыҫһыҙға ҡарата енәйәт эше асылған. Ир - һаҡ аҫтында, ә йәш егет бер ҡайҙа ла китмәү тураһында ҡултамға ҡуйған.

Мутлыҡтар буйынса тикшереү эше дауам итә (уларҙың ошоға оҡшаш башҡа енәйәттәргә ҡағылышы тикшерелә).

Фото: БР буйынса ЭЭМ матбуғат хеҙмәте.