Яҡынығыҙ аварияға тарыны...

Өфөнән 86 йәшлек әбейгә көндөҙгө сәғәт өс тирәһендә стационар телефондан шылтыраталар. Трубканы алғас, пенсионер, ейәнсәрем менән һөйләшәм, тип уйлай - тауыштары оҡшаған кеүек тойола. Шылтыратыусы, юл-транспорт ваҡиғаһына тарыным, минең арҡала кешеләр йәрәхәтләнде, тип хәбәр итә. Үтенеп ярҙам һорай, йәнәһе лә, уға ҡарата енәйәт эшен асмаһындар өсөн аҡса түләргә кәрәк. Әбей, хәҙер ҡыҙыма шылтыратып, хәбәрҙең дөрөҫлөгөн тикшерәм, тигәс, ҡапыл трубкала ир кешенең ҡаты тауышы яңғырай. Ул ҡарт кешегә янап, ҡыҙына шылтыратыуҙың алама тамамланасағы хаҡында иҫкәртеп ҡурҡыта. Бер аҙҙан әбейгә ҡатын, ялған "тәфтишсе", шылтыратып, аҡса түләмәгән осраҡта ейәнсәре өсөн ниндәй эҙемтәләр буласағын тәфсирләп һөйләй. Әбей һуңғаса шылтыратыусыларға ышанырға теләмәй. Әммә муттарҙың үтә ныҡыш булыуы, үҙ ролдәрен оҫта башҡарыуы оло кешенең башын тамам бутай... Таҫтамалға уралған 100 мең һум аҡсаны, һауыт-һаба һалынған пакетты ир кеше килеп ала...

66 йәшлек ҡатынды ла шулай алдап, унан 800 мең һум аҡса талап итәләр. Пенсионер, 100 мең һум ғына аҡсам бар, тип ыуаланғас, ҡалғанын өлөшләтә түләрһегеҙ, тип иҫкәртәләр. Аҡса һәм кәрәк-яраҡ һалынған пакетты ҡатын билдәһеҙ иргә тоттороп сығара.

86 йәшлек әбейҙе ялған "хоҡуҡ һаҡлау органдары хеҙмәткәре" һәм "ҡыҙы" алдап, 200 мең һум аҡсаһын алалар.

Яҡындарының имен-аман булыуын белгәс, пенсионерҙар полицияға ярҙам һорап мөрәжәғәт иткән.

Фото: асыҡ сығанаҡтарҙан.

Автор:Баныу Ҡаһарманова

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

1917-2024 "Йәшлек" гәзите

Баш мөхәррир - Артур Хәсән улы Дәүләтбәков

Мәҡәләләрҙе ҡулланғанда "Йәшлек" гәзитенә һылтанма яһау мотлаҡ. Бөтә хоҡуҡтар яҡланған.