Каруселдәрҙең хәүефһеҙлеге һәм торошо закон буйынса күҙәтелә

Башҡортостан Республикаһы Дәүләт Йыйылышы – Ҡоролтайҙың Сәнәғәт, инновацион үҫеш, сауҙа, эшҡыуарлыҡ һәм туризм буйынса комитеты «Аттракциондарҙың техник торошо һәм уларҙы эксплуатациялау өлкәһендә төбәк дәүләт контроле (надзоры) тураһында»ғы закон проектын хуплап сыҡты. Документ парламенттың ғинуар аҙағындағы пленар ултырышында беренсе уҡыуҙа ҡабул итеүгә тәҡдим ителә, тип яҙа матбуғат хеҙмәте (gsrb.ru).

– Закон проекты аттракциондарҙың хәүефһеҙлеген көсәйтеүгә йүнәлтелгән, – тип асыҡлыҡ индерҙе Дәүләт Йыйылышы – Ҡоролтай Рәйесе Константин Толкачев. – Аттракциондарҙың техник торошона һәм уларҙы эксплуатациялауға мотлаҡ талаптарҙы юридик шәхестәр һәм эшҡыуарҙар тарафынан үтәүҙе төбәк дәүләт контроленең предметы тип билдәләргә тәҡдим ителә.

Эшмәкәрлекте финанслау республика бюджеты иҫәбенә тормошҡа ашырыласаҡ.