Бала ғаиләлә йәшәргә тейеш!

Республикала етем-балалар һәм ата-әсә ҡарауынан мәхрүм ҡалған балалар һаны йылдан-йыл кәмеүгә табан бара.  Әлеге ваҡытта БР Ғаилә, хеҙмәт һәм халыҡты социаль яҡлау министрлығына ҡараған  17 учреждениела 11 меңдән ашыу етем һәм ата-әсә ҡарауынан ҡалған бала йәшәй. Был, 2021 йыл менән сағыштырғанда, 500-гә аҙыраҡ.  Бынан тыш,  ата-әсә хоҡуғынан мәхрүм ителгән ата-әсәләр һаны 2021 йылда 428 булһа, 2022 йылда – 227, йәғни 47 процентҡа кәмегән.   

– Беҙ ғаиләләр менән һөҙөмтәле эш алып барабыҙ,   –  ти халыҡты социаль яҡлау министры   Ленара Иванова. –  Төп бурысыбыҙ  –  балалар учреждениела түгел, ғаиләлә  йәшәһен.  Бөтәһе республикала етем балалар өсөн 18 учреждение бар, шуның 17-һе – беҙҙең ҡарамаҡта.