Оператив хеҙмәттәр яңы йыл байрамында һәм оҙайлы ялдарҙа эшләүгә әҙер

Һаулыҡ һаҡлау министры Айрат Рәхмәтуллин белдереүенсә, поликлиникалар 31 декабрҙә һәм 1 - 8 ғинуарҙа иртәнге сәғәт 8-ҙән киске 5-кә тиклем эшләйәсәк. Табипты өйгә 4-кә тиклем саҡыртырға мөмкин. "Башфармация" дарыуханалары ла эшләргә тейеш. Үрҙә телгә алған көндәрҙә һәм ваҡытта коронавирусҡа ҡаршы прививка яһатыу мөмкинлеге лә бар. Министрлыҡтың бәйләнеш телефоны 122 (2 - өҫтәмә) 4 ғинуарҙан эшләй.

Торлаҡ-коммуналь хужалыҡ министры вазифаһын башҡарыусы Ирина Голованова белдереүенсә, диспетчер хеҙмәттәре, етәкселектең дежурлыҡ графигы раҫланған. Коммуналь инфраструктура объекттарында резерв булдырылған, яғыулыҡ запасы бар, 370 авария-тергеҙеү бригадаһы төҙөлгән.

Юл таҙартырға сыға торған техника ла әҙер.

Өфөлә Ҡыш бабай резиденцияһына бушлай автобус йөрөй («Монумент Дружбы – Набережная реки Белой» – 16:00 - 22:00). Яңы йыл төнөндә лә йәмәғәт транспорты байрам майҙанынан халыҡты ташыясаҡ.

БР Ғәҙәттән тыш хәлдәр буйынса дәүләт комитеты рәйесе Фәрит Ғүмәров әйтеүенсә, 30 декабрҙән 9 ғинуарға тиклем бөтә муниципалитетта янғынды иҫкәртеү штабтары эшләйәсәк.

Фото: БР Башлығы сайтынан.