Бәләбәйҙәр муттарға бирешеп бармай

1954 йылғы ҡатынға билдәһеҙ номерҙан ялған "ейәнсәре" шылтыратып, илап хәбәрен теҙә башлаған: йәнәһе лә, ул юл-транспорт ваҡиғаһына сәбәпсе булған, әлеге ваҡытта дауаханала ята, уға ҡарата енәйәт эшен асмаһындар өсөн тәғәйен кешеләргә аҡса түләргә кәрәк... Илаған тауыш, ысынлап та, ейәнсәренекенә оҡшаған була һәм пенсионер яҡыны өсөн борсолоп, ҡайғыға бата. Ләкин бер аҙҙан үҙен ҡулға алып, ҡыҙына шылтырата, ейәнсәренең хәлен белешә. Ҡыҙы, ейәнсәрең өйҙә, янымда, һине муттар алдарға маташа, тигәс, уяу пенсионер был турала полицияға хәбәр итә. 

Күп тә үтмәй уға йәнә шылтыратып, был юлы бәләгә тарыған "улы" булып һөйләшәләр. Пенсионер, улымдың исеме нисек, тип һорағас, мут бәндә ыҡ-мыҡ килә лә, ниндәйҙер икенсе исемде атай. Ҡатын, юҡ, дөрөҫ түгел, яңылыштығыҙ, тип трубканы һалып, полицияға шылтырата. 

Бәләбәй полицияһы хеҙмәткәрҙәренең мутлыҡтарҙы иҫкәртеү буйынса ҙур эш алып барыуы үҙ һөҙөмтәләрен бирә.

Фото: асыҡ сығанаҡтарҙан.