Тикшеренеүҙәргә ярашлы, беҙҙең илдә йәшәүселәрҙең 25 проценты сихыр-боҙомға ышана. Хатта “типик ышаныусы”ны ла һүрәтләгәндәр. Ул 45 йәштән өлкән, урта-һөнәри йә түбәнерәк белемле, ҙур булмаған тораҡ пунктта (100 меңдән әҙерәк кешеле) йәшәгән, телевизорҙы күп ҡараған ҡатын-ҡыҙ, имеш.
Ир-ат һәм йәштәр, Мәскәү, Питер халҡы “колдун”дарға ышанып бармай. Һорашыуҙар күрһәтеүенсә, ирҙәрҙең – 61, йәштәрҙең – 65, интернетты әүҙем ҡулланыусыларҙың – 63, Мәскәү һәм Санкт-Петербург ҡалаларында йәшәүселәрҙең 64 проценты сихырға ышанмай.
Ә донъяла нисек икән? Pew Research Center үткәргән һорашыуҙарҙан билдәле булыуынса, планетала кәм тигәндә бер миллиард кеше сихырсыларға ышана. Ҡытай менән Һиндостан халҡынан ғына һорашмағандар. Ә унда яҡынса 2,8 млрд кеше йәшәй...