Башҡортостан Хөкүмәтендә республика янғын һүндереү-ҡотҡарыу көстәренең ғәҙәттән тыш хәлдәргә әҙерлеге мәсьәләләре ҡаралды

Ғәҙәттән тыш хәлдәр буйынса дәүләт комитеты рәйесе Фәрит Ғүмәров янғын һүндереү-ҡотҡарыу көстәренең әҙерлеге тураһында ентекләберәк һөйләне. Республиканың Ғәҙәттән тыш хәлдәр буйынса дәүләт комитеты подразделениеларында ҡуйылған бурыстарҙы үтәү өсөн 191 берәмек махсус техника, шул иҫәптән янғын һүндереү-ҡотҡарыу вертолеты, һауа мендәрендә судно, 65 янғын һүндереү машинаһы бар. Фәрит Ғүмәров һүҙҙәренсә, янғын һүндереү-ҡотҡарыу вертолеты ташҡын мәлендә, урман, техноген янғындарын һүндереүҙә үҙенең һөҙөмтәлелеген раҫланы.

Һуңғы өс йыл эсендә янғын һүндереү-ҡотҡарыу подразделениелары 10 меңдән ашыу осраҡҡа юлланған, шул иҫәптән авария-ҡотҡарыу эштәренә - 4517 тапҡыр барған, янғындарҙы һүндереүгә - 1821, юл-транспорт ваҡиғаларына - 690 тапҡыр, водолаздар 224 тапҡыр һыу эштәренә йәлеп ителгән. Йәмғеһе 3447 кеше ҡотҡарылған.

Быйыл Өфө районының Булгаков ауылында модулле янғын депоһы төҙөлгән, Ғафури районының Красноусол ауылында янғын-ҡотҡарыу депоһы төҙөлә. Шулай уҡ Нуриман районы Павловка һыуһаҡлағысына яңы һулыш өргәндәр: унда ҡотҡарыусылар һаны арттырылған (хәҙер 22 кеше эшләй), шәхси составты һәм техниканы урынлаштырыу өсөн модулле бина монтажлана, биләмә төҙөкләндерелә. 

Ултырыш аҙағында БР Хөкүмәте Премьер-министры фажиғәле хәл-ваҡиғалар иҫәбен кәметеү буйынса эште дауам итергә, шулай уҡ 2030 йылға тиклемге осорға иҫәпләнгән янғын һүндереү-ҡотҡарыу көстәрен үҫтереү стратегияһы сараларын һәм тәбиғәт янғындарына юл ҡуймау буйынса программаны тормошҡа ашырыуҙы дауам итергә ҡушты.

- Башҡортостан биләмәләренең 20% ашыуы ирекле янғын һағы аҫтына алынған. Ҡайһы бер муниципалитеттарҙа уларҙың техникаһы һыуыҡ бокстарҙа тора. Был мәсьәләне, шулай уҡ боҙоҡ техниканы ремонтлау, алыштырыу буйынса ла мәсьәләне тиҙ арала хәл итергә кәрәк, - тине Премьер-министр.

Фото: асыҡ сығанаҡтарҙан.