Зәйтүнә Ғәзизова Урал аръяғындағы ҡырҙар киңлеген, Ғилмияза-Зөлхизәләр моңон бәләкәйҙән күңеленә һеңдергән. Шуға 85 йәштә лә уның тыны иркен, күкрәгенән сыҡҡан моң даръяһы һис тә һайыҡмай. Башҡортостандың атҡаҙанған артисы, меццо-сопрано тауышлы опера йырсыһының күңеле йәш, йөҙөнән иман нуры бөркөлә. Уның менән аралашҡас, эх, олоғайғас, беҙ ҙә шулай матур, ғорур булмышлы булып ҡала алһаҡ ине, тип уйлайһың.... Бының өсөн намыҫ-выждан ҡушҡанса йәшәү кәрәк, ти Хәйбулла районы ҡыҙы Зәйтүнә Ғәзизова. Ләйсән ямғыр үткәс, сал даланы нурлаған йәйғор кеүек матур уның күңеле: «Бала саҡта беҙҙең Айыулы ауылында техника юҡ ине. Йәйен ямғырҙан һуң бәпкә үләне ерҙә ҡотороп үҫә. Ә күктә йәйғор ҡалҡа... Шул мәлдә еүеш йомшаҡ үләнгә яланаяҡ баҫам да кинәнеп моң түгәм. Беҙҙең өйҙә гел музыка булды. Темәс педучилищеһында уҡыған бер апайым – мандолинала, ә өлкән ағайым скрипкала уйнаны. Шуларға ҡушылып та йырлайым. Әсәйем, ҡолаҡты ярып алып бара Зәйтүнәмдең тауышы, тиер ине...»
Зәйтүнә Сабир ҡыҙының белем баҫҡыстары шулай: Өфөләге интернат-мәктәп – музыка училищеһы, унан Урал консерваторияһы. Зәйтүнә Екатеринбургҡа (Свердловск) киткәс, балет бейеүсеһе Әсхәт, һөйгәнемде юғалтып ҡуймайым, тип уның артынан килә. Студент туйы үтә. Шул йылдарҙа ғаиләлә Марат исемле малай тыуа.
Уҡып бөткәс, Зәйтүнә Ғәзизова, йыр, йыр кәрәк туған халҡыма, тип Өфөгә ҡайтып төшә. Башҡорт дәүләт опера һәм балет театрында уның икенсе һулышы асыла. З. Исмәғилев, Р. Мортазин, Х. Әхмәтов кеүек композиторҙарыбыҙҙың әҫәрҙәрендәге төп партияларҙы башҡара.
Зәйтүнә апай милли ҡаҙанда ғына ҡайнамай. Уға Петр Чайковскийҙың «Евгений Онегин», «Пиковая дама», Джузеппе Вердиҙың «Дон Карлос»ындағы ҡатмарлы партияларҙы ышанып тапшыралар.
Эштә, юл йөрөгәндә таланттан көнләшкәндәр ҙә осрай, әммә 85 йәшлек ағинәйҙең бер кемгә лә үпкәһе юҡ, күңеле бөтөн. «Миңә илһам биреүселәр – улыҡайым һәм ейәндәрем. Ғаилә дуҫтарыбыҙ осраған һайын: «Зәйтүнә, бер ул – берәгәй ул үҫтергәнһең», – тиҙәр. Тап шулай. Маратым Төркиәлә уҡыны. Халыҡ-ара техник вуздан һуң инглиз телендә диссертация яҙып яҡланы. Шул хеҙмәтен миңә бағышланы. Әсәй булараҡ, сикһеҙ ғорурланам. Тырыш ейәндәрем бар, шөкөр. Киленем дә шәп, иҡтисадсы булғанғамы, тормошто һәр яҡтан бына тигән итеп алып бара», – тип ҡыуана ул. Зәйтүнә Сабир ҡыҙының йәшәү йәме – тап ошо ҡиммәттәр. Уның эсе тулы моң һәм иман байлығы. Сәнғәтебеҙ сәскәһе булған Зәйтүнә Ғәзизованың ғүмер тажы оҙаҡ балҡыһын!
«Йәшлек» гәзите уҡыусылары «Йәшәү йәме» тапшырыуын «Юлдаш» радиоһында һәм https://bash.news/yuldash сайтында тыңлай ала.
Әнисә МУЛЛАҒОЛОВА.