Власть органдары вәкилдәре һәм депутаттар бүләкләнде

 Башҡортостан Республикаһы Дәүләт Йыйылышы – Ҡоролтай Президиумы ултырышын асып, парламент спикеры Константин Толкачев власть органдары вәкилдәренә һәм депутаттарға наградалар тапшырҙы. Уларҙың күбеһе Өфө ҡалаһында 24–25 ноябрҙә үткән Волга буйы федераль округы субъекттарының дәүләт власының закондар сығарыу органдары Ассоциацияһы ултырышын юғары кимәлдә ойоштороуҙы тәьмин итеүгә бәйле билдәләнде, тип хәбәр итә Ҡоролтайҙың матбуғат хеҙмәте.

 Граждандарҙың һәм Башҡортостан Республикаһы дәүләт власы органдарының үҙ-ара һөҙөмтәле эшмәкәрлеген тәьмин итеүгә ҙур өлөш индергәне өсөн Башҡортостан Республикаһы Башлының социаль коммуникациялар буйынса идаралығы начальнигы Елена Прочаковская Башҡортостан Республикаһы Дәүләт Йыйылышы – Ҡоролтайҙың Почет грамотаһы менән бүләкләнде.

Башҡортостан Республикаһы бишенсе саҡырылыш Дәүләт Йыйылышы – Ҡоролтай Рәйесе урынбаҫары Йомабикә Ильясова Башҡортостан Республикаһы ҡануниәтен үҫтереүгә ҙур өлөш индергәне һәм актив ижтимағи-сәйәси эшмәкәрлеге өсөн Дәүләт Йыйылышы – Ҡоролтай Рәйесенең Рәхмәт хаты менән бүләкләнде.

Шулай уҡ Рәхмәт хаттары менән бүләкләнделәр:

«Башнефть» акционерҙар нефть компанияһының Эштәр менән идара итеү буйынса департаменты вазифаһын башҡарыусы Олег Калинин, «Нефтестрой» яуаплылығы сикләнгән йәмғиәте директоры Рамазан Омаров, «Эдвис» уҡыу-методика үҙәге» яуаплылығы сикләнгән йәмғиәте директоры Эдуард Сәйетбаталов, Башҡортостан Республикаһы дәүләт идара итеүенең цифрлы үҫеш министры Геннадий Разумикин һәм Өфө ҡалаһы ҡала округы Советының Дәүләт Йыйылышындағы даими вәкиле Андрей Борисов.