БР Хөкүмәтендә үткән оператив кәңәшмәлә Радий Хәбиров күп балалы ирҙәрҙе кире өйҙәренә ҡайтарырға ҡушты.
«Әйҙәгеҙ, 16 йәшкә тиклемге өс балаһы булғандарҙы саҡырайыҡ. Улар – ике йөҙҙән ашыу кеше. Был ғәҙел булыр тип уйлайым», - тине Башҡортостан Башлығы.
Шуның менән бергә Радий Хәбиров район башлыҡтарына хәрби комиссариаттар менән берлектә яҡын көндәрҙә өйөнә ҡайтҡан хәрби хеҙмәткәрҙәрҙең урынына саҡырылыусыларҙың исемлеген әҙерләргә ҡушты.
– Беҙҙең мобилизация планын үтәү өсөн был кешеләрҙе башҡаларға алмаштырырға кәрәк. Республикалағы мобилизация резервының бик аҙ өлөшөн саҡырабыҙ. Шуға күрә эшләгеҙ, зинһар», - тип ҡушты ул.
РФ Дәүләт Думаһы депутаттары башланғысы менән күп балалы атайҙарҙы өлөшләтә мобилизациялауҙан бушатырға ҡарар ителде. Быға тиклем дүрт һәм унан күберәк балаһы булған ирҙәрҙе генә саҡырмайҙар ине.
Фото:tvc.ru