Бөтә яңылыҡтар
Яңылыҡтар таҫмаһы
14 Октябрь , 16:15

Ир менән ҡатын муттарға ике миллион һумдан ашыу аҡса күсергән

Салауат ҡалаһында йәшәгән 57 йәшлек ҡатынға бер аҙна элек ялған "банк хеҙмәткәре" шылтыратып, билдәһеҙ әҙәмдәрҙең иҫәптәге аҡсаны урлап, уның исеменә кредит та алырға маташыуҙары хаҡында хәбәр иткән. Йәнәһе лә, быға юл ҡуймаҫ өсөн, ҡатындың үҙенә банкка барып, кредит алырға ла, аҡсаларҙы "ышаныслы" иҫәпкә күсерергә кәрәк. Ҡатын муттарҙың был схемаһы тураһында хәбәрҙар булған, ә шулай ҙа шылтыратыусының һүҙен тыңлап, аҡсаһын "бик ышаныслы" иҫәптәргә күсергән. Иртәгеһенә уға тағы ла шул уҡ "банк хеҙмәткәре" шылтыратҡан...

Ир менән ҡатын муттарға ике миллион һумдан ашыу аҡса күсергән
Ир менән ҡатын муттарға ике миллион һумдан ашыу аҡса күсергән

Был юлы аферист ҡатынды Өфөгә банкка барып, иң ҙур суммаға кредит алырға өгөтләп күндергән. Ҡатын икеләнгәс, уға ялған "хоҡуҡ һаҡлау органдары хеҙмәткәре" шылтыратып, мотлаҡ "банк хеҙмәткәренең" әйткәндәрен үтәргә ҡушҡан. Һәм ҡатын кредиттар алған, таныштарынан да бурысҡа аҡса алып, муттарға күсергән.

Бер нисә көн үткәс, уға йәнә шылтыратып, ире исеменә кредит алырға маташыуҙары тураһында "һөйөнсөләгәндәр". Ире менән "хоҡуҡ һаҡлау органдары хеҙмәткәре" һөйләшкән... Ир ҙә аферистарҙың инструкцияһын теүәл үтәгән.

Зыян күләме ике миллион һумдан ашыуыраҡ, тип яҙа Салауат ҡалаһының ЭЭМ бүлегенән Зилә Кинйәкәева.

Тәүлек эсендә муттар 18 кешене алдаған! Улар иҫәбенә эләгә күрмәгеҙ, һаҡ булығыҙ!

Фото: асыҡ сығанаҡтарҙан.

Автор:Баныу Ҡаһарманова
Читайте нас в