Ҡотло булһын өйөгөҙ!

Мәктәп урамындағы күп фатирлы йорт "Торлаҡ һәм ҡала мөхите" милли проектын тормошҡа ашырыу сиктәрендә төҙөлгән.

- Тағы ла 25 ғаилә - 74 кеше - яңы фатир алыу бәхетенә эйә булды. Миәкә районы быйыл авария хәлендәге торлаҡтан кешеләрҙе күсереү буйынса сараларҙы ваҡытынан алда тамамланы, - тип билдәләне төҙөлөш һәм архитектура министры вазифаһын башҡарыусы Егор Родин.

Асҡыстарҙы тапшырыу тантанаһында Башҡортостан Республикаһының Авария хәлендәге торлаҡ фонды директоры урынбаҫары Алексей Малинский ҡатнашты.

- Яңы торлаҡҡа күсеү - һәр ваҡыт шатлыҡлы ваҡиға. Өй туйлаусыларҙы иркен, төҙөкләндерелгән фатир менән ҡотлайым. Һеҙҙең йортта бәхет, йылылыҡ һәм йәм тантана итһен, - тине Алексей Малинский.

Миәкә районы хакимиәте башлығы Ришат Аҡтуғанов һүҙҙәренсә, яңы микрорайонда кәрәкле инфраструктура бар: асфальт юл һалынған, 120 урынлыҡ балалар баҡсаһы, магазиндар төҙөлгән, балалар баҡсаһы менән 80 урынлыҡ башланғыс мәктәп төҙөү планлаштырыла.

- Халыҡ үҙ йорттарында рәхәтләнеп йәшәһен өсөн, артабан да биҫтәне үҫтерергә ниәтләйбеҙ. Бәхетле тормош, һаулыҡ теләйем һәм шундай шатлыҡлы көндәр күберәк булһын, - тип билдәләне Ришат Аҡтуғанов.

Иҫегеҙгә төшөрәбеҙ, "Торлаҡ һәм ҡала мөхите" милли проекты сиктәрендә Миәкә районы биләмәһендә Комаров урамындағы 2-се һәм 4-се һанлы йорттарҙы күсереү планлаштырылғайны. Ошо маҡсатта ике өс ҡатлы күп фатирлы йорт төҙөлгән. "Стройвысота-Инвест" яуаплылығы сикләнгән йәмғиәте 2021 йылдың июнендә йорттарҙы төҙөй башлағайны. Беренсе йорт 2021 йылдың декабрендә файҙаланыуға тапшырылып, ете ғаилә яңы фатир асҡыстарын алды (ике ғаилә - аҡсалата компенсация). Икенсе йорт 2022 йылдың авгусында файҙаланыуға тапшырылды. Граждандарҙы авария хәлендәге торлаҡ фондынан күсереү - РФ Президенты ҡуйған иң мөһим бурыстарҙың береһе.

Фото: асыҡ сығанаҡтарҙан.