+22 °С
Ямғыр
Яңылыҡтар таҫмаһы
3 Август 2022, 06:42
Юл фажиғәләре - 2 август
Уҙған тәүлектә республика юлдарында алты автомобиль аварияһы теркәлгән, уларҙа ике кешенең ғүмере өҙөлгән, туғыҙ кеше төрлө йәрәхәттәр алған. Бер тәүлектә Дәүләт автоинспекцияһы хеҙмәткәрҙәре тарафынан 1700-ҙән ашыу юл хәрәкәте ҡағиҙәләрен боҙоу осрағы асыҡланған, 27 эскән водитель тотолған (шуларҙың бишәүһе ошоға тиклем дә иҫерек килеш машина йөрөтөп, инспекторҙарға эләккән булған).
Юл фажиғәләре - 2 август
Алдан хәбәр итеүебеҙсә, кисә Иглин районында ике үлемесле авария теркәлгән.
Көндөҙгө сәғәт икелә Һамар-Өфө-Силәбе автоюлының 1541-се саҡрымында Көйөргәҙе районынан 49 йәшлек водитель "Man" йөк машинаһында ыңғай барған "Scania"ға барып бәрелгән. Был бәрелеүҙән "Scania" алдан барған икенсе "Маn"ға һуғылған. Аварияла ауыр йәрәхәтләнгән 49 йәшлек водитель йән биргән...
Өс сәғәттән һуң ошо уҡ юлдың 1546-сы саҡрымында Өфөнән 52 йәшлек ҡатын "Renault Kaptur" машинаһында ҡаршы килгән "Man" фураһына ҡағылып, ҡаршы килгән "Lifan Solano" машинаһына маңлайға-маңлай бәрелгән. Аварияла "Lifan" водителе, 35 йәшлек ҡатын, шунда уҡ һәләк була... Уның 12 йәшлек улы, 10 йәшлек ҡыҙы дауаханала. "Renault" водителе менән ике пассажиры, 35 йәшлек ҡатын менән 15 йәшлек ҡыҙ ҙа, медучреждениеға оҙатылған.
Ике юл-транспорт ваҡиғаһы буйынса тикшереү бара.
Юлда һәләк булғандарҙың яҡындарының ауыр ҡайғыһын уртаҡлашабыҙ...
Фото: БР ЮХХДИ.
