Юлдарҙа һуғышмы ни...

Алдан хәбәр итеүебеҙсә, Благовар районында микроавтобус менән аварияла алты кешенең ғүмере өҙөлдө, 18 кеше, шул иҫәптән ике бала, йәрәхәтләнде.

Краснокама районында ике машина бәрелешеп, 17 йәшлек ҡыҙ йән бирҙе, дүрт кеше йәрәхәтләнде. 

Баймаҡ ҡалаһында билдәһеҙ водитель 14 йәшлек үҫмерҙе тапап, авария урынынан ҡасты. Оператив-эҙләү саралары барышында ЮХХДИ хеҙмәткәрҙәре бер ауылда кешене тапауҙың үҙенсәлекле билдәләре булған «LADA XRAY» машинаһын тапҡан, водителде эҙләү дауам итә.

Төнгө сәғәт ун икенселәрҙә Өфөлә, Октябрь проспектында, 29 йәшлек ир «Infiniti M35» машинаһында 47 йәшлек йәйәүлене тапай. Йәйәүле һәләк булған.

Төнгө сәғәт беренсе яртыла Мәсетле районының Оло-Ыҡтамаҡ ауылында 21 йәшлек егет «Yamaha» мотоциклында ҡаршы килгән «Daewoo Nexia»ға барып бәрелеп, һәләк булған. Уның 20 йәшлек пассажиры ла "Тиҙ ярҙам" килгәнгә тиклем тын алыуҙан туҡтаған. Уларҙың, исмаһам, мотошлемдары ла булмаған... 

Юлдарҙа һәләк булғандарҙың яҡындарының ауыр ҡайғыһын уртаҡлашабыҙ...

Фото: БР ЮХХДИ.