Рәхәт кенә!

23 һәм 24 июлдә «Фазенда» клубы (Ҡырмыҫҡалы районының Нижнетимкино ауылы) территорияһында тәүгә “Сәләмәтлек һәм туризм” Бөтә Рәсәй һауыҡтырыу практикалары фестивале уҙасаҡ. Был сара – бәхәсләшеү, фекер алышыу, ғилми темаға һөйләшеүҙәр, күргәҙмә майҙансығы ла.

Ойоштороусы – Мунсала сабыныу белгестәренең милли федерацияһы булышлығында Башҡортостан Хөкүмәте. Фестивалгә 1000-дән ашыу туризм тармағы белгесенең килеүе көтөлә. Шулай уҡ унда БР Хөкүмәте Премьер-министры Андрей Назаров, Рәсәйҙең ҙур СПА-үҙәктәре, мунса комплекстары етәкселәре, РФ Һаулыҡ һаҡлау министрлығы вәкилдәре сығыш яһаясаҡ.

Фестивалдең эшлекле программаһына “Бизнес булараҡ – мунса” бизнес-форумы ла ингән. “Рәхәттә” (”На рахате”) беренсе мунса фестивален үткәреү ҙә күҙаллана. Уның маҡсаты – мунса инеү мәҙәниәтен таратыу. Туризмдың бер өлөшө икән ул.

Тағы бер сара – ошо уҡ фестивалдә үләндәр йыйыу оҫталары ла осрашасаҡ. Шифалы үҫемлектәргә иғтибарҙы арттырыу ваҡыты етте!

Сараларға килеү өсөн https://нарахате.рф сайтында теркәлергә кәрәк.