Башҡортостанда һуттар етештереләсәк!

Башҡортостандың иҡтисади үҫеш һәм инвестиция сәйәсәте министры Рөстәм Моратов Үзбәкстан менән берлектә тормошҡа ашырылған проекттар тураһында һөйләне.

— Йылытма хужалығы, оҙайлы туңдырыу, сублимациялау — былар барыһы ла беҙҙең өсөн үҫешкә этәргән яңылыҡ. Беҙҙә һут етештереү буйынса завод асыласаҡ. Быны Үзбәк хеҙмәттәштәребеҙ тәҡдим итте. Әле беҙ проектын, урынлашасаҡ урынын әҙерләйбеҙ, — тип белдерҙе Рөстәм Моратов.

Үзбәкстан вәкилдәре шулай уҡ картуф үҫтереү һәм эшкәртеү мөмкинлектәре менән ҡыҙыҡһынған. 

—  Чипсы етештергән үзбәк компанияһы менән килешеүҙәр алып барабыҙ. Шулай уҡ улар менән берлектә шәкәр сөгөлдөрө үҫтереү һәм эшкәртеү күләмдәрен арттырырға иҫәп тотабыҙ, —  ти министр.

Бынан тыш, Башҡортостан һәм Үзбәкстан мамыҡ етештереүҙе яйға һалмаҡсы. Республика был илде туҡыма етештереү ҡорамалдары менән тәьмин итә.