Башҡортостан Башлығы Баймаҡта социаль объекттарҙа булды

Радий Хәбиров төҙөлөш һәм ремонт эштәре барған урындарға туҡталды. Баймаҡтың 3-сө мәктәбенә, мәҫәлән, капиталь ремонт яһала. Шулай уҡ балалар поликлиникаһы төҙөлә.

Әйткәндәй, ремонт талап ителгән мәктәптәрҙе яңыртыу Рәсәй Президенты Владимир Путин ҡушыуы буйынса махсус программаға ярашлы бара. Әлеге уҡыу йорто ла шул исемлеккә ингән. Эштәр апрелдә башланған, 1 сентябргә бөтөргә тейеш. Балалар әлегә 4-се лицей бинаһында уҡый. Уларға уңайлы булһын өсөн ваҡытлыса йәмәғәт транспорты графигы ла үҙгәртелгән.

Радий Хәбиров балалар поликлиникаһында ла булды. 300 кешене ҡабул итеүгә тәғәйенләнгән был бина былтыр төҙөлә башлаған. Республика - 440,3 млн, федераль ҡаҙна 372,2 млн һум аҡса бүлгән.

- Баймаҡ халҡына был поликлиника бик кәрәк ине. шуға ла төҙөргә булдыҡ. Эш барышы контролләнә. Биләмәне төҙөкләндереү ҙә күҙаллана. 2022 йыл аҙағына балаларға заманса дауалау учреждениеһы әҙер буласаҡ, - тине Радий Хәбиров.

фото: БР Башлығы сайтынан.