Әбйәлил ветерандары өсөн Еңеү парады ойошторолдо

Әбйәлил районында Бөйөк Ватан һуғышы ветерандары Ҡотлогилде Төхвәтуллин менән Мәхмүт Ишҡоловтарҙың йорт алдында Еңеү парады ойошторолдо. Ҡаһарман ветерандарҙы район хакимиәте башлығы Илдар Нафиҡов ҡотланы.

Бөгөн районда ике генә ветеран ҡалған. Мәхмүт ауылында ҡыҙы менән ғүмер иткән Ҡотлогилде Төхвәтуллин пулеметсы булып хеҙмәт итә. «Беҙ һуғышҡа райондан өс йөҙҙән ашыу кеше бергә киттек. Ә хәҙер бик аҙ ҡалдыҡ. Тән һәм күңел яраларынан йәшләй генә китеп бөттөләр шул фронтташтар...» — тип әсенде. Үҙе лә ауыр йәрәхәттәр алғанға, сәләмәтлеге шәптән түгел, аяҡтары һыҙлай. Шулай ҙа оло уҙаман донъя, ил яңылыҡтарына хәбәрҙар.

Ҡотлогилде Төхвәтуллин Латвия һәм Литвала була, Көнсығыш Пруссияны азат итеүҙә ҡатнаша. Еңеү яҙын Берлинға 70 километр ҡалғанда ҡаршылай.

- Ағайҙарым да, еҙнәйҙәрем дә һуғыштан ҡайтманы. Фронтҡа алыуҙарын һорап үҙем барҙым. Капитан менән лейтенант ултыра ине. Капитандың күҙе йәшләнде, уйланып ултыра торғас яҙып ҡуйҙы. Шулай “добровольно” һуғышҡа киттем инде, - ти Ҡотлогилде олатай.