Әбйәлил һәм Баймаҡ райондары халҡы өсөн ҡыуаныслы яңылыҡ!

«Башкиравтодор» предприятиеһы 66,3 саҡрым оҙонлоҡтағы Асҡар – Әлмөхәмәт – Сибай трассаһын ремонтлауҙы тамамлап килә. Был маҡсатта 258,5 миллион һум аҡса йүнәлтелгән. Йәйгә башланыуға бында ремонт эштәрен тамамлаясаҡтар һәм транспорт хәрәкәтенә старт бирәсәктәр.

– Юлды төҙөкләндереү ике район араһындағы транспорт бәйләнешен яҡшыртыуға, юл хәрәкәте хәүефһеҙлеген арттырыуға булышлыҡ итәсәк, – тип белдерә БР транспорт һәм юл хужалығы министры урынбаҫары Виктор Жульков.

Иҫегеҙгә төшөрәбеҙ, Асҡар һәм Сибай араһындағы юлды төҙөкләндереү 2020 йылда башланғайны, ул 3 этаптан торҙо. Ошо көндәрҙә юл ремонтлаусылар асфальт-бетон япмаһының өҫкө ҡатын һала башланан. Бөгөнгәсә 2 саҡрым асфальт түшәлгән. Тағы ла 3,7 саҡрым юлды ремонтлайһы бар. Юл эштәренә 40 берәмек техника йәлеп ителгән.