Ауыл туризмын үҫтерәсәкбеҙ...

Башҡортостандың дүрт туристик проекты Бөтә Рәсәй акселерация программаһының ауыл һәм экологик туризмды үҫтереү башланғыстарын яҡлау конкурсында киләһе турға үтте. Йәмғеһе конкурсҡа илдең ҡырҡ төбәгенән 76 ғариза ҡабул ителгән. Баһалау комиссияһы 40 проектты һайлап алған.

Программа 1 февралдә старт алған. Өс ай ярым дауамында тәжрибәле белгестәр менән онлайн-сессиялар үткәрелгән, иң яҡшы Рәсәй һәм Европа ауыл туризмы тәжрибәләре ҡаралған.

Баһалау комиссияһы Башҡортостандан «Башҡорт каникулдары», «Мәғрүр Ирәмәл» проекттарын һайлап алған. Шулай уҡ тауыш биреү һөҙөмтәләре буйынса республикабыҙҙан «Ерҙе әйләндерәбеҙ» һәм «Үҙ иркемә-өлөшөмә» проекттары киләһе турға үткән.

– Ауыл туризмын үҫтереү һәм туристик проекттарҙы тормошҡа ашырыу социаль-иҡтисади әһәмиәткә эйә. Республика туристик ойошмаларының тарихи-мәҙәни, экологик үҙенсәлектәрҙе иҫәпкә алып, проекттар һәм маршруттар төҙөүе бик шәп, – тип белдерҙе Туризм буйынса дәүләт комитеты рәйесенең беренсе урынбаҫары Ринат Фәтҡуллин.

Артабан эксперт тауыш биреүендә еңгән проект хужаларына акселераторға ярашлы ярҙам күрһәтеләсәк. Ә халыҡ тауыш биреүендә еңеп сыҡҡандарға вебинарҙар һәм эксперт консультацияһы бүләк ителесәк.