Фронтовик-шағирҙарҙың үҙенсәлекле тауыштары яңғыраясаҡ

– Бөйөк Ватан һуғышы йырҙары һәм шиғырҙары - дошманды еңеү генә түгел, ә художестволы образдарҙа үҙ фекерҙәрен, характерын, тыуған илгә һөйөүен һәм Еңеүгә ынтылышын сағылдыра алған халҡыбыҙҙың рухи байлығының мөһим бите. Бөйөк Ватан һуғышының тәүге көндәренән шағирҙар һәм яҙыусылар фашизмға ҡаршы көрәшкә баҫҡан. Уларҙың төп ҡоралы – һүҙ. Башҡортостан радиоһы архивтарында фронтовик шағирҙарҙың тауышы һаҡланған - улар үҙҙәре лә шиғырҙарын уҡый. Тап ошо яҙмалар видеороликтар өсөн нигеҙ булған, – тип һөйләне проект авторҙары.

“Башҡортостан” дәүләт телерадиокомпанияһы директорының радиотапшырыуҙар буйынса урынбаҫары Тәнзилә Үлмәҫбаева әйтеүенсә, әлегә ун исем һайлап алынған, күберәк эшләргә лә мөмкин. Уларҙың фонотекаһында егерменән ашыу Бөйөк Ватан һуғышында ҡатнашыусы шағирҙың тауышы һаҡлана.

Проектты Башҡортостан юлдаш телевидениеһы режиссеры Светлана Громова, шулай уҡ танылған оҫта Руслан Юлтаев («Өс хат», «Сируси», «Бәхет ҡошо») тормошҡа ашырырға тотонған.

Республиканың төп телеканалы экранынан Муса Ғәлиҙең, Хәким Ғиләжевтың, Ҡадир Даяндың, Мостай Кәримдең, Хәниф Кәримдең, Сәләх Кулибайҙың, Яҡуп Ҡолмойҙоң, Назар Нәжмиҙең, Ғилемдар Рамазановтың, Зәйни Рафиҡовтың хәрби лирикаһы яңғыраясаҡ. Проекттың үҙенсәлеге шунда: авторҙарҙың күпселек әҫәрҙәре рус теленә тәүгә тәржемә ителгән.

Башҡортостан юлдаш телевидениеһы тамашасылары "Яугир һүҙе"н традицион май байрамдарында ҡарай һәм ишетә аласаҡ.

Фото: Т. АМАНОВ.