«Арттан машиналарға атып ҡалдылар...»

Бөгөн Дондағы Ростовтан Өфөнөң тимер юлы вокзалына Донбасстан һәм Луганскиҙан мәжбүри күсенеүселәр төркөмө килеп төштө. 306 кеше, шул иҫәптән 69 бала, улар араһында яраланған граждандар, инвалидтар бар. Ҡайһы бер күсенеүселәр үҙҙәре менән йорт хайуандарын да алған, 4 эт, 5 бесәй, бер тутыйғош һәм бер ташбаҡа бар, тип хәбәр итә БР Ғәҙәттән тыш хәлдәр буйынса дәүләт комитеты рәйесе Фәрит Ғүмәров.

Күсенеүселәрҙең бер өлөшө Стәрлетамаҡҡа оҙатылды, ҡалғандары Өфөлә ҡалды. Улар өсөн профилакторийҙарҙа һәм шифаханаларҙа ваҡытлыса урынлаштырыу пункттары әҙерләнгән. Граждандар аҙыҡ-түлек, медицина ярҙамы һәм беренсе кәрәк-яраҡ әйберҙәр менән тәьмин ителә.

БР ғаилә, хеҙмәт һәм халыҡ социаль яҡлау министры Ленара Иванова әйтеүенсә, һәр күсенеүсегә документтар тергеҙеүҙә һәм эшкә урынлаштырыуҙа ярҙам күрһәтеләсәк, шулай уҡ 10 мең һум күләмендә ярҙам бүленәсәк.