Балаҡайҙар тәҙрәнән осоп төшмәһен!

"Синоптиктар ял көндәрендә йылы һауа торошон фаразлай, тимәк, балаларҙың тәҙрәнән ҡолап төшөүе менән бәйле бәхетһеҙ осраҡтарҙың булыуы ихтимал. Ҡарауһыҙ ҡалдырғанда, балалар бейеклектән ҡолап төшөп, ауыр, хатта үлемесле йәрәхәттәр алыуы мөмкин", - тип яҙҙы үҙенең телеграм-каналында Башҡортостан Республикаһының Ғәҙәттән тыш хәлдәр буйынса дәүләт комитеты рәйесе Фәрит Ғүмәров. Шулай уҡ ябай ғына хәүефһеҙлек ҡағиҙәләрен иҫкә төшөрҙө:

- диван, өҫтәл, ултырғыстарҙы тәҙрә янына ҡуймағыҙ;

- балалар тәҙрә төбөндә уйнамаһын, яңғыҙ балконға, лоджияға сыҡмаһын;

- бинаны елләткәндә балаларҙы ҡарауһыҙ ҡалдырмағыҙ;

- балаларға тәҙрәне үҙ аллы асырға мөмкинлек бирмәгән ҡоролмаларҙы файҙаланығыҙ;

- москит сеткаһына алданмағыҙ - ул баланың ауырлығына иҫәпләнмәгән.

Бәләкәй балаларҙы бер мәлгә лә иғтибарһыҙ, яңғыҙ ҡалдырмағыҙ, ата-әсәләр!

Фото: асыҡ сығанаҡтарҙан.