Бөгөн – Ерҙе һаҡлау көнө

Ғалимдар асыҡлауынса, кеше Ер йөҙөндә 200 мең йыл самаһы элек барлыҡҡа килгән. Оҙаҡ ваҡыт ул тәбиғәт менән килешеп йәшәгән. Әммә сәнәғәттең, етештереүҙең тиҙ үҫеше, фәнни-техник прогресс эҙһеҙ үтмәй: кешенең хужалыҡ эшмәкәрлеге тирә-яҡ мөхитте бысратыуға килтерә...

Экология проблемаларына иғтибар йәлеп итеү өсөн махсус дата булдырылған да инде. Ерҙе һаҡлау көнө йыл һайын 30 мартта билдәләнә.

Урмандарҙы ҡырҡыу, һауаны етештереү һәм автомобилдәрҙән сыҡҡан бысраҡ төтөн, һыу ресурстарын сәнәғәт һәм канализация ҡалдыҡтары менән бысратыу, бик күп хайуанды, балыҡты, ҡошто юҡ итеү, радиация – былар барыһы ла планетаны тәләфләй. Һәр ерҙә файҙалы ҡаҙылмалар сығарыу ерҙе сүллеккә, бушлыҡҡа әйләндерә. Нефть сығарыу һәм ташыу тирә-яҡ мөхиткә ныҡ зыян килтерә. Ер өҫтөнә нефть түгелеүе айырыуса хәүефле. Глобаль йылыныу, урман янғындары, озон тишектәре... Хәүефтәрҙе һанап бөткөһөҙ.

Дөйөм өйөбөҙ булған Ерҙе ҡасан ысын кимәлдә һаҡларға өйрәнербеҙ икән? Килер быуындарға нимә ҡалдырабыҙ?