Учалы районы Ҡолош ауылында "Буранай уйындары" үтте

Ҡолош ауылы "Айыҡ ауыл" республика конкурсында учалыларҙың данын яҡлаясаҡ. Унда былтыр Сәләмәтлек һәм әүҙем оҙон ғүмерлелек йылы айҡанлы саралар гөрләп үтһә, быйылғы Башҡорт мәҙәниәте һәм рухи мираҫ йылында ла төрлө-төрлө саралар бик күп ойошторолоп үткәрелә. Шуларҙың береһе - “Буранай уйындары”.

Күңелдәргә дәрт өҫтәгән, байрам кәйефен бүләк иткән, милли уйындарға яңы һулыш өргән сараның төп йәме – дүрт бәйгенән торған ат сабыштары булды, әлбиттә. Мәргәнлеккә, сослоҡҡа һынау тотҡан уҡсыларҙың ярыштары ла, районыбыҙҙа тәүге тапҡыр ойошторолған ҡыҙыҡлы ярыш – ауҙарыш та ҡыҙыу барҙы, тамашасы күңеленә хуш килде. "Ҡолош апайҙары” фольклор коллективы, Башҡортостандың атҡаҙанған артисы, мультиинструменталист Заһир Зәйнетдин, "Заман" этно-төркөмө, Учалы филармонияһының “Уралтау” бейеү ансамбле солистары Ирина Әһлиева һәм Башҡортостандың атҡаҙанған артисы Илшат Исхаҡов һәм башҡа артистар сараға мәртәбә, йәм өҫтәне.

Фото: асыҡ сығанаҡтарҙан.