Ginza Project холдингы Башҡортостан менән хеҙмәттәшлек итергә әҙер

   Осрашыу барышында улар төбәктә заманса сауҙа майҙансыҡтарын, яңы туҡланыу һәм хеҙмәт  күрһәтеү объекттарын булдырыу хаҡында фекер алышты.   

 – Башкортостан –  ауыл хужалығы, аҙыҡ-түлек һәм эшкәртеү сәнәғәте үҫешкән төбәк.  Беҙҙең халыҡ урында етештерелгән аҙыҡ-түлеккә нығыраҡ иғтибар бирә, шунлыҡтан  тармаҡ инвестиция проекттарына ярҙам итергә тырышабыҙ, – тине Радий Хәбиров.  – Ginza Project – Рәсәйҙең ҙур ҡалаларында билдәле бренд.  Беҙ һеҙҙең компания менән республикала төрлө эш форматтарын ҡарарға әҙербеҙ. 

Холдингтың ойоштороусыһы  Дмитрий Сергеев эштең һәм үҙ-ара хеҙмәттәшлектең  өҫтөнлөклө йүнәлештәре хаҡында һөйләне.

– Беҙ Мәскәү һәм Санкт-Петербург ҡалаларының ресторан бизнесы тармағында эшләй башланыҡ.  Бөгөн компания Рәсәйҙең күп төбәгендә үҫешә.  Иң төп проекттарҙың береһе – ғаилә ялын ойоштороу  хеҙмәтен күрһәтеү мөмкинлеге булған яңы форматтағы баҙар булдырыу.  Был йүнәлештә Башҡортостандың мөмкинлеге ҙур, –  тине ул.