«Яңы авторҙар ҙа йәлеп итергә кәрәк»

Ул  «Викимедиа РУ» коммерцияға ҡарамаған партнерлығы (Мәскәү), Башҡорт телен һаҡлау һәм үҫтереү фонды, Бөтә донъя башҡорттары ҡоролтайы, Башҡортостандың Мәғариф һәм фән министрлығы булышлығында ойошторолдо. Үткән йылдарҙан айырмалы рәүештә, форум онлайн рәүештә үткәрелде. Конференцияның виртуаль залында бөтә республиканан утыҙлаған әүҙем кеше йыйылды, шул уҡ ваҡытта You-Tube каналыннан тура эфир ҙа барҙы.

– Һуңғы ике йылда википедиясылар ғәҙәттәгесә күҙгә-күҙ ҡарашып осрашыу мөмкинлегенән мәхрүм. Әммә йыйылған мәсьәләләрҙе тикшереү, киң йәмәғәтселекте йәлеп итеп, ирекмәндәр эшмәкәрлеген планлаштырыу кәрәклеге тороп ҡалды. 2015 йылда Башҡорт дәүләт университетында ойошторолған тәүге ҙур конференция Башҡорт Википедияһы үҫешендә һынылыш булды. Быйылғы форумда доклад менән сығыш яһарға теләүселәр ҙә етерлек булды. Дөйөм белем биреү йорттары уҡытыусылары дәрестә онлайн-энциклопедия материалдарын ҡулланыу тәжрибәһе менән уртаҡлашырға теләй, мөхәррир-википедиясылар синыфтан һәм мәктәптән тыш эшмәкәрлек өсөн тикшеренеү эштәренең яңы йүнәлештәрен тәҡдим итә. Шулай уҡ «Stepik» белем биреү платформаһында «Википедияға инеү» бушлай онлайн-курсы һәм «Рәсәй ирекмәндәре» порталы тураһында белдерҙек, унда ирекмәндең электрон китабында Википедия мәҡәләләрен мөхәррирләүгә тотонолған ваҡытты иҫәпкә алырға мөмкин», – тип билдәләне Башҡорт Википедияһын ойоштороусыларҙың һәм илһамландырыусыларҙың береһе Рөстәм Нурыев.

Форумда ҡатнашыусыларҙы Бөтә донъя башҡорттары ҡоролтайы Президиумы рәйесе, РФ Дәүләт Думаһы депутаты Эльвира Айытҡолова сәләмләне.

– Тәү сиратта Башҡорт Википедияһын ойошторған, булдырған кешеләргә ҙур рәхмәт әйткем килә. Рөстәм Нурыев, Гүзәл Ситдиҡова, Зәйтүнә Ниғмәтйәнова, Зөфәр Сәлихов, Ансар Нуретдинов һәм башҡалар – тап улар виртуаль энциклопедия эшен алып барған илһамландырыусылар, энтузиастар, – тине ул.

Һуңғы йылдарҙа Башҡорт Википедияһы һәм Бөтә донъя башҡорттары ҡоролтайы араһында хеҙмәттәшлек һиҙелерлек әүҙемләште. Былтыр Башҡорт тарихы йылы айҡанлы викимарафон уҙҙы, уның маҡсаты башҡорт телендә сифатлы контентты арттырыу, вики-проектҡа республика райондарынан һәм ҡалаларынан ғына түгел, Рәсәйҙең башҡа төбәктәренән, башҡа илдәрҙән дә әүҙем, вайымлы кешеләрҙе йәлеп итеү ине. Байтаҡ конкурстар, шул иҫәптән  «Башҡорттар», «Тарихи Башҡортостан топонимияһы», «112-се Башҡорт кавалерия дивизияһы яугирҙары», «Башҡорт Википедияһының белешмә биттәре» һәм башҡа конкурстар ойошторолдо. Шулай уҡ Рөстәм Нуриев бер нисә тапҡыр «Википедия: ҡыҫҡа танышыу курсы» онлайн-курстарын үткәрҙе.

– Быйыл Бөтә донъя башҡорттары ҡоролтайы тарафынан Башҡорт мәҙәниәте һәм рухи мираҫы йылы тип иғлан ителде. Йылдың методик тәҡдимдәрендә Википедия тураһында ла мәғлүмәт бар: беҙ район һәм ҡала ҡоролтайҙарын виртуаль энциклопедия эшендә әүҙем ҡатнашырға саҡырабыҙ. Туған телдәге виртуаль энциклопедияны мәғлүмәт менән тулыландырыу буйынса эште артабан да әүҙемләштерергә, яңы авторҙар йәлеп итергә кәрәк, – ти Эльвира Ринат ҡыҙы.

Башҡорт энциклопедияһының иң әүҙем авторҙарының береһе, билдәле шағир, журналист һәм йәмәғәт эшмәкәре Гүзәл Ситдиҡова ошо йүнәлештәге эшмәкәрлеге хаҡында һөйләне.

– Мин виртуаль энциклопедияла теүәл 10 йыл элек теркәлдем. Ошо осорҙа 22 756 мәҡәлә яҙҙым, шул уҡ ваҡытта башҡорт телендә мәҡәләләрҙең дөйөм һаны 60 мең самаһы ине. 4487 бит эшләнем, 359 фото ҡуйҙым, 41 меңдән ашыу төҙәтмә индерҙем. Әүҙем хеҙмәттәшлек өсөн Википедия проектынан 32 тапҡыр рәхмәт хаты алдым, - тип һөйләне Гүзәл Рамаҙан ҡыҙы.

Былтыр ирекмәндәргә Башҡортостандың дәүләт телдәрен һәм төбәктәге халыҡтарҙың телдәрен һаҡлауға һәм үҫтереүгә йүнәлтелгән субсидиялар формаһында республиканың Гражданлыҡ башланғыстарына булышлыҡ итеү фонды бүлгән Башҡортостан Республикаһы Башлығы гранты сараларын тормошҡа ашырыу буйынса ҙур эш башҡарылды. Яңы эш башлаусы википедиясыларҙың мәҡәләләре һәм бер нисә уҡыу ағымы буйынса конкурстар ойошторолдо.

Форумда википедияла ҡатнашыусылар Википедияның сифат һәм һан яғынан контенты, тематик бүлектәрҙең көнүҙәк мәсьәләләрен тикшерҙе, илдең төрлө төбәктәренән авторҙарҙы йәлеп итеү, республиканың киң мәғлүмәт саралары менән мәғлүмәти йәһәттән үҙ-ара эш итеү тураһында мәсьәләне күтәрҙе.

Фото: Т. АМАНОВ.