Волейбол буйынса донъя чемпионатын ойоштороуҙа ҡатнашырға теләйһеңме?

21 февралдә волейбол буйынса донъя чемпионатына ирекмәндәр йыйыу башлана. Беләһегеҙ, ярыш 26 августан 11 сентябргә ҡәҙәр Рәсәйҙең ун ҡалаһында үтәсәк. Спорт сараһын ойоштороуға 3500 ирекмәнде йәлеп итеү ҡарала – улар тамашасылар, журналистар һәм командалар менән эшләйәсәк, асыу-ябыу тантаналарын ойошторасаҡ.

Волейбол буйынса чемпионаттың 25-се командаһына ҡушылыу өсөн volley2022.ru/volunteers сайтында ғариза ҡалдырырға кәрәк. Ирекмәндәргә талаптар: чемпионат башланыу ваҡытына гражданға 18 йәш тулған булырға тейеш, инглиз телендә аралашыу, командала эшләй белеү мотлаҡ.

Июнь-август айҙарында ирекмәндәрҙе уҡытасаҡтар. Ошо уҡыуҙы үткән һәр кем бәйгене ойоштороуҙа ҡатнаша аласаҡ. Ирекмәндәргә кейем-һалым, иҫтәлекле сувенирҙар һәм йәмәғәт транспортында бушлай йөрөү мөмкинлеге бирелә, уларҙың һәр береһе страховкаланасаҡ. Спорт объекттарында бушлай туҡланырға мөмкин буласаҡ.