Башҡортостанда "Ярҙам десанты" акцияһына старт бирелде

"Берҙәм Рәсәй" партияһының "Беҙҙең хәстәр" проекты сиктәрендә Башҡортостанда "Ярҙам десанты" акцияһына старт бирелде. Акцияла 350 автоирекмән ҡатнашып, 700-ҙән ашыу кешегә ярҙам күрһәтелгән - 100 кеше өсөн туҡланыу ойошторолһа, 600-ҙән ашыу кешегә бушлай аҙыҡ-түлек йыйылмаһы таратылған. Улар араһында оло йәштәгеләр ҙә, һаулығы буйынса мөмкинлектәре сикләнгәндәр ҙә, өйҙә коронавирус инфекцияһынан дауаланыусылар ҙа бар.

Сарала Дәүләт Думаһы депутаттары Павел Качкаев, Римма Үтәшева, Рафаэль Мәрҙәншин шәхсән ҡатнашһа, башҡа парламентарийҙар исеменән уларҙың ярҙамсылары аҙыҡ-түлек йыйылмаларын таратышҡан. Төрлө кимәлдәге депутаттарҙан тыш, сараны "Саф йөрәк" хәйриә фонды, Йәштәр йәмәғәт палатаһы, БР мосолмандары Диниә назараты, Ҡыуатов исемендәге Республика клиник дауаханаһы, ирекмәндәр үҙәге, "Йәш гвардия" әүҙемдәре һәм башҡа ойошмалар, спортсылар, артистар күтәреп алған.

2020 йылдан алып ойошторолған акция февралдә аҙна һайын үткәреләсәк. Сираттағы "Ярҙам десанты" 8 февралдә үтәсәк.

Фото: асыҡ сығанаҡтарҙан.