«Ҡурай даны» милли телепремияһына кемдәр лайыҡ булды?

2020 – 2021 йылдарҙа телепремияға 45 ҡатнашыусы – «Ҡурай» телеканалы тамашасылары тәҡдим иткән замандаштарыбыҙ дәғүә итте. Был юлы «Ҡурай даны» икенсе милли телепремияһы 9 номинация буйынса уҙғарылды: «Ер кешеһе», «Һөнәр оҫтаһы», «Эшлекле ханым», «Ҡул оҫтаһы», «Ижади ғаилә», «Миһырбанлы ғаилә», «Спорт ғаиләһе», «Тренер года», «Йыл режиссеры». 2020 – 2021 йылдар дауамында Башҡортостан юлдаш телевидениеһы һәм «Ҡурай-ТВ» телеканалдарында тамашасыларҙы дәғүәселәрҙең һәр береһе менән таныштырыу маҡсатында тапшырыуҙар эфирға сыҡты. «Ҡурай даны» көмөш миҙалы хужаларын телетамашасылар интернет-тауыш биреү ярҙамында һайланы.

Шулай итеп, Учалы районынан Альфред Мөхөтдинов – «Ер кешеһе», Әбйәлил районынан табип-онколог Ренат Мәһәҙиев – «Һөнәр оҫтаһы», Өфөнән кафе селтәрҙәре директоры Рита Абдрахманова һәм "Ағиҙел" башҡорт сәнғәт кәсептәре" дәүләт унитар предприятиеһы директоры Гүзәл Кәримова  – «Эшлекле ханым», Әбйәлил районынан Мансур Усманов – «Ҡул оҫтаһы», Баймаҡ ҡалаһынан Илүзә менән Артур Иҫәновтар  – «Ижади ғаилә»,  Ейәнсура районынан Гүзәл менән Хәмит Ҡыуатовтар, Белорет районынан Гөлнур менән Сәлим Асҡаровтар – «Миһырбанлы ғаилә», Ишембай районынан Алһыу менән Рөстәм Хәсәновтар – «Спорт ғаиләһе», Өфө районының Шамонин ауылынан биатлон буйынса тренер Айгөл Хәкимова, Мәсетле районынан хоккейҙы үҫтереүгә тос өлөш индергән Фирғәт Мөниров  –  «Йыл тренеры», Мостай Кәрим исемендәге Милли йәштәр театрының баш режиссеры Рөстәм Хәкимов «Йыл режиссеры» номинацияларында еңеүсе булды. Барыһын да ихлас күңелдән ҡотлайбыҙ!

Фото: https://vk.com/kuraitv1.