Прокуратура Антон Орловҡа ҡарата енәйәт эше буйынса ғәйепләү һығымтаһын раҫланы

Дәүләт Думаһы депутаты Александр Ющенконың элекке ярҙамсыһы, медицина хеҙмәткәрҙәре профсоюзының төбәк координаторы Антон Орлов «Нефте-сервис» йәмғиәте директоры урынбаҫары булараҡ 2020 йылдың февралендә Үзбәкстан YUSUF BOBO FAYZ фирмаһына 260 т дизель яғыулығы тапшырыу һылтауы менән 11 млн һум аҡса урлай. Бынан тыш 2020 йылдың июлендә Антон Орлов, Константин Соколов һәм Вячеслав Ғизәтулин "Гермес" йәмғиәте исеменән "Гайрат-82" йәмғиәте вәкилдәренә шыйыҡландырылған углеводород газының ҙур партияларын һатыу буйынса ялған мәғлүмәттәр биреп, "Гайрат-82" йәмғиәтенә 14,8 млн һумлыҡ зыян килтерәләр, йәғни аҡсаны алалар, әммә яғыулыҡ ебәрелмәй.

«Ъ-Уфа» мәғлүмәттәре буйынса, полицияға ғаризаны «Нефте-сервис» һәм «Гайрат-82» яҙған.

Антон Орлов үҙ ғәйебен танмаған. Енәйәти эҙәрлекләү - ижтимағи һәм профсоюз эшмәкәрлеге арҡаһында, тип белдергән ул "Ъ-Уфа" гәзитенә.

Фото: асыҡ сығанаҡтарҙан.