Петуния үҫтереү еңел түгел

Петуния үҫентеһен үҫтереү буйынса үҙемдең серҙәрем менән бүлешәм .

   Япмалы һауытҡа тупраҡ, уның өҫтөнә ҡар һалам да, орлоҡтарҙы һибәм. Һуңынан  ҡапҡасын ябам йә шыптырҙаҡ (полиэтилен) эсенә ултыртам да йылыға (20-25 градус) ҡуям.

     Әгәр тупрағығыҙ ҡоро булып, ирегән ҡар һыуы еүешләй алмаһа, һауыттың ситтәренән генә ҡаты сәй төҫөндәге фитоспорин эретмәһен  ҡойорға кәрәк. Уны һиптергес менән дә һиптереп сығырға мөмкин.

  Көн һайын бер-ике минутҡа ҡапҡастарын асып торам, уларҙағы парҙы (конденсат) һөртөп алам.

Өс көндән яҡты урынға урынлаштырам . Юғиһә ҡайһы бер «ҡабаланғандары» шытып сығып, оҙоная башлай.

Аҡ ептәре (тамыр буласаҡ) күренә башлау менән ҡапҡастарын саҡ ҡына асып ҡуям. Сөнки артыҡ дымлылыҡ ауырыуҙарға килтерә.

Орлоҡ япраҡтары (семядольные листья) сыҡҡас та, ҡапҡастарҙы алмайым, нығынып алғандарынса һаман шулай асығыраҡ көйө торалар.

Тупраҡ ҡорой башлаһа ғына һыу ҡойорға. Һиптергес (пульверизатор) менән ҡойорға яратмайым, шуға ипләп кенә балғалаҡ менән фитоспоринлы һыу ҡоям.

Күптәр: «Әгәр яһалма яҡтыртҡыс (искусственное освещение) булмаһа, үҫентеләрҙе нисек үҫтерергә?» – тип һорай.

Петунияларҙы үҫтерә башлағанда миндә лә ундай яҡтыртҡыстар булманы. Көндөҙ уларҙы тәҙрә төбөнә ҡуйып, һауыттың аҫтына нәмә ҡуйып, тәҙрәгә табан ҡыйшайтып ҡуя инем. Тик бәләкәй, көсһөҙ генә саҡтарында көнө буйы ҡояштан йәшерергә тура килә. Эшкә киткәндә ҡайһы тәҙрәгеҙгә ҡояш төшмәйерәк тора, шунда ҡуйып китергә онотмағыҙ. Ә төнгөлөккә һыуыҡтан һаҡлау өсөн унан алып торорға кәрәк .

Нығынып китһәләр, киреһенсә, иң һәйбәт урын, ҡояшлы тәҙрә төптәре була инде.Сәскәләрҙе күберәк сәсһәгеҙ, тәҙрәгә өҫтәмә кәштәләр ҙә ҡуйып алырға була.

                                                                                                                                                                                                Гөлдәр ЙӘҒӘФӘРОВА.

                                                                                                                                                                                                         Бөрйән районы,

                                                                                                                                                                                                            Нәби ауылы