Башҡортостанда ҡарар ҡабул ителде

Башҡортостандың парламенты йорт хайуандарын мотлаҡ идентификациялау һәм иҫәпкә алыу тураһындағы федераль закон проектын хупланы. Тейешле норманы Рәсәй Ауыл хужалығы министрлығы әҙерләгән.

БР Дәүләт Йыйылышы-Ҡоролтай спикеры Константин Толкачев билдәләүенсә, йорт хайуандарына мотлаҡ чиптар ҡуйыу бер юлы бер нисә бурысты хәл итәсәк: хужаға юғалған этте табырға ярҙам итәсәк һәм, ул ташланған йәки һөжүм иткән осраҡта, кешегә уның хужаһын эҙләүҙе тиҙләтәсәк.

 – Әгәр кешеләр үҙ йәнлектәре менән яуаплыраҡ мөғәмәлә итһә, бесәйҙәр һәм эттәр хужаһыҙ хайуандар армияһын өҙлөкһөҙ тулыландырыуҙан туҡтаясаҡ, – тип иҫәпләй төбәк парламенты Рәйесе.

 Толкачев бынан алда БР  Дәүләт Йыйылышы – Ҡоролтайының Дәүләт Думаһына ошоға оҡшаш закон проектын индереүен, ләкин ул саҡта уның беренсе уҡыуҙа уҡ кире ҡағылыуы хаҡында ла белдерҙе. Шуға ҡарамаҫтан, норма яңы инициативала сағылыш тапты.

Фото: Т. Аманов