Вокал буйынса уҡытыусы, Учалы филармонияһы солисы Гөлсиә Бөрйән районының Брәтәк ауылында 1987 йылдың 18 июнендә тыуған. Мәктәпте тамамлағас Учалы сәнғәт һәм мәҙәниәт училищеһына (әлеге ваҡытта С. Низаметдинов ис. Учалы сәнғәт һәм мәҙәниәт колледжы) уҡырға инә. «Халыҡ йырын яңғыҙ башҡарыу» бүлексәһендә БР атҡаҙанған мәҙәниәт хеҙмәткәре М.Вәлиевала уҡый. 2007 йылда З.Исмәғилев ис. Өфө дәүләт сәнғәт институтында уҡый башлай.
Талантлы һәм сағыу йырсы Абдулла Солтанов призына башҡорт йырҙарын башҡарыусыларҙың район конкурсында II дәрәжә лауреат дипломын алды, йәш музыканттарҙың асыҡ республика конкурсының дипломанты, «Башҡорт йыры» фестивале лауреаты булып танылды, фольклор башҡарыусыларҙың республика конкурсында I дәрәжә лауреат дипломын яуланы.
Һуңғы тапҡыр социаль селтәрҙә аралашҡанда, март айына концерт ҡуйырға теләйем, Һеҙҙән сценарий кәрәк ине, тип яҙғайны ул. Теләктәре тормошҡа ашмай тороп ҡалды... Гөлсиәнең йәне йәннәттә булһын.
Фото: асыҡ сығанаҡтарҙан.