Радий Хәбировтың мөһим күрһәтмәһе

Бер нисә тема ҡаралды: коронавирустан прививкалау, вакцина яһатмағандарға сикләү саралары, мәктәптәрҙең уҡыуға әҙерлеге һ.б.

Республиканың һаулыҡ һаҡлау министры Максим Забелин белдереүенсә, бөгөнгә 2 063 250 кеше тулыһынса вакцина яһатҡан. Был - бөтә кешенең 83 проценты.

"Роспотребнадзор"ҙың республика буйынса етәксеһе Анна Казак әйтеүенсә, сир сигенгән кеүек.

Радий Хәбиров былай тине:

- Коронавирусҡа бәйле хәл тотороҡло. Шулай ҙа сикләүҙәрҙе бөтөрөргә нигеҙ юҡ. Рәсәйҙә "омикрон" штамы йоҡтороу осраҡтары бар. Был иртәме-һуңмы вирустың яңы төрө беҙгә лә килеп етеүе ихтимал, тигән һүҙ. Уға әҙер булырға тейешбеҙ.

Мәктәптәр ҡышҡы каникулдан һуң балаларҙы ҡабул итергә әҙер. Уларҙа санитар-эпидемиологик хәл-торош контролләнәсәк. 2196 медицина инспекторы эшләй.

Радий Хәбиров муниципалитеттар башлыҡтарына киләһе аҙнанан мәктәптәрҙең уҡыуға әҙерлеген тикшерергә һәм директорҙар менән кәңәшмә үткәрергә ҡушты. 

- Ата-әсәләр ҙә, уҡытыусылар ҙа шуны аңларға тейеш: әгәр бала үҙен насар тоя икән, ул өйҙә ҡалһын. Мәктәптәрҙә вирус таралыуға юл ҡуйырға ярамай, - тине республика етәксеһе.

Икенсе аҙнанан коронавирусҡа бәйле тикшереүҙәр көсәйәсәк. Был вакциналауға ла ҡағыла.

Фото: электрогазета.рф