«Башавтотранс»та йөҙ миллионынсы пассажир!

«Башавтотранс» бер быуатлыҡ юбилейын билдәләне, үҙенең автопаркын һәм маршрут селтәрен киңәйтеп, пассажирҙар ағымын арттырыуға өлгәште. Ә кисә дәүләт ташыусыһы йөҙ миллионынсы пассажирын хеҙмәтләндерҙе. 

– Бөтә ташыу төрҙәре буйынса ла иҫәп алып барылды, ҡала, ҡала яны, ҡала-ара һәм килешеү буйынса ташыуҙар, – тип аңлата предприятие генераль директоры урынбаҫары Александр Паскин.

Был юлы Өфө – Нефтекама автобусына билет алған пассажир Рада Әхмәтҡәләмоваға бәхет йылмайған. Уға ике ҡаланың автовокзалында ла иҫтәлекле бүләктәр тапшырылды. Сувенирҙар хатта Рада Әхмәтҡәләмова ултырған автобустың бөтә пассажирына ла таратылды. Бынан тыш, йөҙ миллионынсы пассажирҙың фотоһы предприятие музейында урын аласаҡ.