+21 °С
Болотло
Яңылыҡтар таҫмаһы
31 Октябрь 2021, 14:34
Һеҙгә ревизор килә!
Октябрьскийҙағы балалар баҡсаһының стационар телефонына билдәһеҙ ир шылтыратып, Мәғариф министрлығы хеҙмәткәремен, тип үҙе менән таныштырған да, баҡса мөдирен саҡырырға ҡушҡан. Балалар баҡсаһы мөдиренә ул бер сәғәттән тикшереү килеүе тураһында хәбәр иткән: "Комиссияны ҡаршылар өсөн документацияны тәртипкә килтерергә, өҫтәл һәм бүләктәр әҙерләргә кәрәк!" Һөйләшергә уңайлыраҡ булһын өсөн, тип мөдирҙән кеҫә телефонының номерын һорап алған ир бер нисә минуттан, банк картаһына 10200 һумды күсерегеҙ ҙә, кәрәк-яраҡты үҙем һатып алып киләм, тип "ярҙамын" тәҡдим иткән. 41 йәшлек ҡатын тамсы ла шикләнмәйенсә шул сумманы ир әйткән иҫәпкә күсергән.
Һеҙгә ревизор килә!
Бер аҙҙан балалар баҡсаһы хеҙмәткәрҙәре башҡа балалар баҡсаларына ла шундай уҡ комиссия килеүе хаҡында хәбәрҙар булған. Тик шылтыратыусы ирҙең генә ("министрлыҡта эшләүсенең") фамилияһы һәр ваҡыт икенсе төрлө яңғыраған. Шунда ғына балалар баҡсаһы хеҙмәткәрҙәре муттың тоҙағына эләгеүен аңлап, полицияға мөрәжәғәт иткәндәр.
Оҡшаш енәйәт Белорет районында ла теркәлгән.
Комплекслы тикшереүҙәр һөҙөмтәһендә мут бәндәнең шәхесе асыҡланған.
Алдан да хөкөм ителгән 32 йәшлек ир Һарытау өлкәһендәге колонияларҙың береһендә ултыра. Һорау алғанда ул нисек итеп төрмәлә кеҫә телефонына, сим-карталарға эйә булғанын, мутлыҡ схемалары тураһында һөйләп биргән.
Аҡсаға ҡытлыҡ кисереп, август аҙағында ул Мәғариф министрлығы хеҙмәткәре булып кешеләрҙе алдап, кемдән дә булһа аҡса һығырға ниәтләгән. Ышаныслы һөйләшер өсөн ул балалар баҡсаһын тикшерергә килгән комиссияларҙың ниндәй документтар талап иткәнен ентекле өйрәнгән. Интернеттан балалар баҡсаһы номерҙарын эҙләп табып, ниәтен тормошҡа ашырған. Аҡсаларҙы ул танышының иҫәбенә күсерттергән.
Муттан кеҫә телефонын, сим-карталарҙы алғандар. Уның ошоға оҡшаш мутлыҡтарға ҡатнашлығы тикшерелә, тип яҙа Октябрьский ҡалаһынан юрисконсульт Анна Сергеева.
Фото: БР буйынса ЭЭМ матбуғат хеҙмәтенән.
