+30 °С
Болотло
Яңылыҡтар таҫмаһы
5 Июль 2021, 16:30
Муттар аҡса һуға
Иғландар сайтында осһоҙ хаҡҡа иномарканы һатыу тураһында иғланды күреп, Белорет ҡалаһында йәшәүсе 42 йәшлек ир шунда уҡ һатыусыға шылтырата һалған. Машинаһын үлтереп маҡтаған авто хужаһы ауыр хәлдәге туғанын дауаларға аҡса талап ителгәнгә генә "ҡарлуғасын" һатыуын аңлатҡас, 100 мең һум аванс һораған, йәнәһе лә: "Машинаны алырға теләүселәр - донъя, ә һин аҡса күсерһәң - машина һинеке тигән һүҙ". Һатып алыусы күп уйлап тормаған, уға аҡса күсергән. Икенсе көндө Магнитогорск ҡалаһына авто алырға килгәс кенә аферистан алданғанын аңлаған. Шул уҡ көндө Белореттан тағы бер ҡатын осһоҙ ҡыйбатлы машинаға ҡыҙығып, мут бәндәгә интернет аша 50 мең һум аҡса һалған. Әлеге ваҡытта аферисты эҙләйҙәр ҙә бит, ҡасан табырҙар - билдәһеҙ...
Стәрлетамаҡта йәшәгән ир популяр сайттарҙың береһендә видеокарта һатылыуы хаҡында иғланға тап булып, һатыусыға 108 мең һум аҡса күсергән.
Аҡса күсеү менән һатыусы юғалған. Ләкин уны полиция хеҙмәткәрҙәре эҙләп таба алған. 32 йәшлек аферист Стәрленән. Уға ҡарата енәйәт эше асылған.
Туймазы районында йәшәгән 41 йәшлек ир интернет аша 20 мең һумлыҡ бассейн һатып алырға йыйынған. Тик онлайн заказ яһап, аҡса күсергән ир бассейнды көтөп ала алмаған. Сөнки сайт ябылған, һатыусының телефоны һүнгән булған. Ҡыҫҡаһы, полиция хеҙмәткәрҙәренә эш өҫтәлгән.
Фото: асыҡ сығанаҡтарҙан.
