295 мең кеше вакцина эшләткән

Төбәккә бөтәһе 428450 «Спутник V», «ЭпиВакКорона» һәм «КовиВак» вакциналары алынған. 7 июнгә ҡарата алынған мәғлүмәттәр буйынса 384472 кеше вакцинаның беренсе компонентын эшләткән, 295278 кеше вакциналауҙың ике этабын да үткән. Был хаҡта вице-премьер – республиканың һаулыҡ һаҡлау министры Максим Забелин бөгөнгө оператив кәңәшмәлә хәбәр итте.

Иҫегеҙгә төшөрәбеҙ, коронавирустан вакцинаны регистратура йә «Дәүләт хеҙмәте» порталы аша алдан яҙылып, 167 вакциналау пунктында йә мобиль пункттарҙа яһатырға мөмкин. Бынан тыш, «Сәләмәт республика – сәләмәт төбәк» акцияһы барышында 19 апрелдә алты маршрут буйынса сәфәргә сыҡҡан сәләмәтлек поездарында тапшырырға мөмкин.

14 майҙан Өфө ҡалаһында коронавирустан вакцина эшләтеүселәр араһында конкурс башланды. Унда ҡатнашыу өсөн вакциналау пункттарының береһендә вакцина эшләтеп, QR-кодлы флаер алырға һәм «Сәләмәт Өфө» сайтында теркәлергә кәрәк. Конкурста ҡатнашыусылар араһында бүләктәр, шул иҫәптән бер бүлмәле фатир һәм 10 смартфон, 23 июндә «Вся Уфа» каналында тура эфирҙа уйнатыласаҡ. Акция 20 июнгә тиклем дауам итә.

Фото:Т.Аманов.